- I ‘steut tins, paç’ qui dj’è l’ ratindeu dispus quatre ans !
Après lès qualificâcîyons nén trop malôjîyes pou lès bèljes avou dins leû groupe, dès-èquipes a leû pôrtéye, lès sérieûsès-afères dalît tout d’ minme cominchî après ètou deûs-amicâlès pârtîyes : èl Crowasie avou n’ victwêre di 0 a deûs èyèt ène Tunisie bén fwèbe a Brussèles èt batûwe pa 5 a 0. Dins lès 48 èquipes satchîyes ô sôrt, no payîs tchèyeut dissus l’Edjipe, l’Iran èyèt l’ Nouve Zélande. In deuzième toûr qui d’veut yèsse ôjîy’mint dins l’ potche.
El pârtîye qui drouveut l’ tournwè èsteut èl 11 di jwin a Mecsico intrè l’ Mecsique èyèt l’Afrike du Sud.
Ariveut èl 15 di jwin avou l’ premîyère pârtîye di l’èquipe di Bèljique conte l’Edjipe a Seattle.
C’èst gonflè come nén deûs qui l’ome s’aveut mètu divant s’ bwêsse ôzès-imâdjes. Ene mîyète pus timpe, il-aveut yeû l’idéye d’è dalér al Vile pa-d’vant in djèyant ècran, mins après rèflèc.sîyon, i trouveut qui c’èsteut ôsè avou s’ pètite santè.
- Èn-ac.cidint èst si râde arivè ! Èyèt ètou, èl tchaleû …
Adon, c’èst pa-d’vant s’ pètite bwêsse ôzès-imâdjes qu’il-aveut chû çu qui d’veut yèsse èl preumîyère victwêre dès roudjes diâles.
Maleûreûs’mint, adon qu’èl pârtîye ‘steut cominchîye di 20 munutes, Ashour mârque èyèt lès bèljes n’ont pus qu’a couru après l’èscôre.
L’antrin.neû a fét dès candj’mints : Raskin èt De Cuyper, Vanaken èt Fernandez, mins l’ pus-impôrtants, c’èst Lukaku al 65 ième. Trente sucondes pus tôrd, Hany, talonè pa Lukaku, a d’vu mârquér conte ès’ camp. L’èscôre n’a pus boudjî môgré lès cris dès 66700 spèctateûs. P’tit louwis, come tous lès supôrtèrs, èd’mèreut sins vwè. Mins apès tout, in pwint, c’èst mieû qui zéro.
Mins dèdja ariveut èl dimègne chûvant avou l’ pârtîye conte l’Iran qu’aveut fét in nul conte èl Nouve Zélande.
Intrè lès deûs, l’ome aveut yeû l’tins di rèflèchi ôzès noûvès réques. I-gn-a toudis a toutes lès coupes du monde. « Èl djoke frécheû », c’èst n’afêre qui chève djusse pou co z-awè dès liârds avou dèl rèclame èyèt ètou a câssér l’djeû. Qwè qui dès-antrin.neûs sont binôjes di donér dès noûvès consignes a leûs djouweûs.
Èl dimègne ô niût ariveut l’ pârtîye avou l’Iran. Rola, Garcia aveut fét quate candj’mints èyèt fèyeut cominchît Lukaku. Wêre a dîre dèl pârtîye, sinon qui lès bèljes ont co in côp mô djouwè. D’ayeûrs, is-ont yeû dèl tchance d’awè l’VAR qu’a anulè in balon dins l’ gayole da Courtois pou in wôrs-djeû nén vèyu pa l’ârbite. Pîre, N’goye a stî tapè a l’uch èyèt lès bèljes ont d’vu djouwér ène dèmîye eûre a dîj. Qwè r’tènu : rén d’bon sinon dès disbordemints su lès costès èt dès centes ènn’ chèrvant a rén puç’ qui Lukaku bateut l’ bûre ô mitan. Pont d’ djeû avou èn-antrin.neû qui parècheut pièrdu. Djusse Courtois qui f’yeut dès bias-arèts. Come di l’ôte costè l’Egype bateut l’ nouve Zélande, èle pèrdeut l’ preumîyère place.
Èl sèm’di ariveut avou l’pârtîye dèl qualif ou dèdja du r’toûr. P’tit Louwis aveut mètu s’ ranvèy’ pou 4 eûres èt quart. Insi, i n’ rateut rén dès comentéres, ni surtout dèl composicîyon di l’èquipe bèlje. Môgré sès trèyins d’ santè, èl nouvia pa Doku èsteut la, mins nén Lukaku. Su l’ côp d ‘cénq eûres, l’ome an nwêr( qui n’ l-èst pus jamés) a chuflè l’ cominch’mint dèl pârtîye dins l’èstâde di vancouvèr.
Dîj munutes di djeû èyèt c’èsteut pont d’ chance pou Trossard qu’èvôyeut l’ balon su l’ potia. Dîj munutes pus tôrd, tèrtous crwèyeut ô côp d’ rèparâcîyon sôf èl VAR qui fèyeut candjî d’avis l’ârbite. Trossard, èl mô inmè, ‘steut distchin.nè èt mârqueut dins-in cafouyâdje al 28 ième. Mieû, i r’comincheut al 50 ième munute. Tout daleut bén. Surtout qui De Bruyne tapeut su l’ clô pou in trwèsième. Domâdje qui Courtois n’a nén t’nu s’ gayole vûde puç’ qui Just fèyeut 3 a yin. C’èsteut mwés pou l’ difèrance di buts. Mins c’èsteut sins comptér su Lukaku. Ene cénqantène di s’condes après yèsse intrè ô djeû, i fèyeut 4 a 1 èyèt pou chûre, Saelemaekers qui va fièstér sès 27 ans, mârqueut l’ cénquième dins lès-arèts d’ djeû.
Come dins l’ôte pârtîye, l’Iran èyèt l’Egype ènn’ savît s’ dispârtadjî, lès bèljes finichît preumî di leû goupe avou l’acèrtinance di d’meurér a Seatèl èyèt di djouwér in trwèsième. Ca s’ra l’ Sénégal ! L’aventûre continûwe.