- Dji sé qu’on n’ pout nén plére a tèrtous èyèt l’ contrére èst l’ vré ètou !
Dji wè voltî quasimint tous lès spôrts, mins bén-ètindu, i-gn-âreut co bén ène èc.sèpcîon. Dji wè voltî lès Djeûs Olympiques, mins nén lès céns d’Iviêr. Pouqwè ?, dalèz m’ dimandér. Bén v’la n’ boune quèstîyon ! Probâbe qui c’è-st-a côse dèl nîve ! Tant lès spôrtifs qui cour’nut ou sôtèl’nut ô-d’zeû dès bâres ou lanç’nut dès tchinisses sont toudis la pou m’ fé blèfér, du costè dès djeûs d’Iviêr, dji n’é nén invîye. Gn-a nén n’ saqwè qu’acrotche a lès wétî. Sôf p’tête bén lès bobslèds qui disquind’nut dins l’ glace a dès tèrîbès vitèsses di pus di 120 kulomètes/eûre. Gn-a minme qu’arîv’nut a 160.
Lès compèticîyons ont cominchî a Sint Moritz an 1889. A ç’ momint-la, c’èsteut dès trin.nôs di bos avou dès lames di fièr. On s’arindjeû pou qu’ lès djins qui s’ mètîchent dissus fuchent pèsants : djusse qu’a 118 kulos èyèt insi disquinde èl pus râde possîbe puç’ qui c’èst l’ but du spôrt. I s’ pratique a seûs ou co bén a quate. Èn-équipâdje èst compôsè di quate djins : èl cén qui mwin.ne, deûs poûsseûs èyèt yin qui frin.ne. Pou l’èspôrt a deûs, i-gn’a bén seûr pont di poûsseûs. Ô cominch’mint, is pouss’nut tèrtous pou prinde dèl vitèsse èyèt après, is sôtèl’nut dins l’ bob.
- Mi, dji n’ voureu nén m’ risquér a n’ téle afêre. Choûtèz n’ mîyète çu qu’i s’ passe !
Quand on-è-st-èvôye, c’èst surtout n’ quèstîyon di trajèctwêre pou dalér l’ pus râde possîbe. L’anjin èst djusse controlè pô mwin.neû, pal frin.neû èyèt pal gravitè. I vos fôt d’meurér ô mitan dèl vôye. Si vos dalèz su l’ dizeû dins lès toûrnants, vos fèyèz pus’ di tch’mwin èyèt vos pièrdèz du tins su lès-ôtes. Èyèt si vos dalèz trop su l’ bas du toûrnant, èl fôrce cantrifuge va diminuwér èt vos sôrtirèz pus malôiy’mint di cès-ci.
Ène pisse mèsûre intrè 1200 èt 1600 mètes di lon avou ène pente di 8 a 15 pour cint. I-gn-a 15 a 20 virâdjes nén jamés lès minmes. I fôt sawè qui dins lès toûrnants, lès meûrs di glace poul’nut awè djusqu’a chîj mètes di wôteû.
D’vîsons n’ mîyète di matèrièl a ç’ te eûre : lès trin.nôs di bos ont stî rèplacîs pa dès tchinisses an cârbone. Bén-ètindu, a dès parèyès vitèsses, i-gn-a dès frins : c’èst dès bares dint’léyes qui vèn’nut s’ plantér dins l’ glace. Bén seûr, on n’ lès fét dalér qui quand èl boblèd a passè l’ line d’arivéye. Bén-ètindu, lès djins qui pârticip’nut ont dès casques. Ètou dès t’nûwes an lycra qui diminûw’nut branmint èl prîje ô vint. Sins roubliyî lès solérs a crampons, mins nén come lès céns qui djouw’nut ô fotbale : rocî, gn-a pus di 250 crampons pa solér. Leûs folès vitèsses féy’nut pinsér ôzès cènes dès pilotes di Formule yin an plin virâdje (èl cénq G).
In bob fét ô minimum 170 kulos èyèt lès coureûs sont dès vrés spôrtifs qui non seûl’mint cour’nut râde, mins sont capâbes di r’lèvér dès grands pwèds.
I fôt r’ conèche qui no p’tit payîs n’a pont di bob. Lès grands payîs pou çoula, c’èst l’ Suisse èyèt l’Al’magne. Comint n’ nén vos d’vîsér dèl Djamaïque avou leû n-istwêre di 1988 qui d-a valu in film ène mîyète romancè, mins ô dèpârt vré (Rasta Rockett).
Pou chûre, vèl-ci saquants nôs conus dins l’ monde du bobslèd : Eugenio Monti, in coureû italîyn qu’a stî chîj côps mèdayès Olympiques dins lès-anéyes 50 èt 60 èyèt l’al’mand Wolfgang Hoppe, chîj mèdâyes ètou di 84 a 92.
Èn-ôte spôrt qui li r’chène, mins qui dwèt co yèsse pus fôrt pou lès sansâcîyons, c’èst l’èskèlèton. Èl djint è-st-a plat vinte, tièsse pa-d’vant, su ène plantche d’a pô près in mète èt qui r’chène a ène luje.