Èl mârdi 5 di déçambe di l’anéye passéye, c’èsteut l’ tirâdje ô sôrt dèl coupe du monde 2026 di fotbale. Ça s’ passeut a Washington DC avou l’ présîynce du Présidint Trump (qui s’a co fét r’mârquér come a s’ abutûde). Ètou, gn-aveut l’ Présidint dèl Fifa, Gianni Infantino. Li, pou frotér l’ mantche da Trump, i lyi a ofru ène noûve mèdâye qu’il-a advintè : èl cène dèl Fifa dèl Pé.
P’tit Louwis tèneut l’ gazète dins sès mwins. Gn-aveut n’ dèmîye eûre qu’i r’wéteut l’ pâdje consacréye al coupe. Bén seûr qui tous lès quate ans, l’ome ratindeut çoula come in tchat après n’ soris.
Tout d’in côp, l’ome sôtèle du fôteuy.
- Cint quate pârtîyes, ça d’é vôt lès pwênes !
Fôt dîre qu’on passe di 32 a 48 èquipes. On poureut ètou dîre qu’èl coupe du monde s’èrtrouv’ra dins trwès payîs : l’Amèrique, mins ètou èl Canada èyèt l’Mèc.sique. I n’ d-è faleut nén d’ pus pou qui P’tit Louwis s’èvâye d’ès’ comantére :
- Nos-ôtes, on s’î conèt an canadas ! Ça s’ra pus ôjîye pou gâgnî !
Pou d’èrvènu ô spôrt, si on d’vîsse di chîfes, ça s’ra douze groupes di quate payîs. Is djouw’ront dins seize viles : 2 Canada èyèt 3 ô Mèc.sique, lès-ôtes an-Amèrique.
- Dj’é co souv’nance dèl coupe du monde ôs-Ètats-Unis an 1994 intrè l’Italîye èyèt l’ Brésil.
Non seûl’mint lès groupes sont satchîs, mins ètou l’ calandrî dis’vwèlè 24 eûres pus tôrd. Il-èst vré qu’i-gn-a yeû dès trèyins pou-z-organisér tout çoula avou lès fusôs oréres. Pa èc.simpe, pou no payîs, i-gn-a in discalâdje di 9 eûres pa rapôrt al côte ouwèst. C’ n-èsteut nén ôjîye pou lès supôrtèrs èd’meurès ô payîs qu’is wèyîjent leûs djouweûs favoris.
Èl preumîyère pârtîye du toûrnwè ès’ djouw‘ra ô stâde di Mèc.sico intrè l’Mèc.sique èyèt l’Afrique du Sud èl 11 di jwin.
Èl dérène pârtîye, èl finâle quand a lèye, ès’ f’ra èl 19 di djulèt dins l’èstâde di New york ô New Jèrsey.
Bén oyi, dès mytiques stâdes come èl cén di Mèc.sico, Toronto ou Los Angeles.
Èl gâgnant âra djouwè 8 pârtîyes pou cwèfér èl courone.
Èl tènant du tite an 2022 ô Quatar, c’èsteut rap’lèz-vous, l’Ârdjantine qu’aveut adon batu èl France dins-ène tèrîbe pârtîye qui s’aveut fini pa in scôre di trwès pârtout pou z-arivér a n’ victwêre ôs satchîs dès pènâltis.
Lès mésses dèl Fifa duvît chwèsi intrè 16 groupes di trwès-èquipes ou bén 12 groupes di quate.
C’èst l’ deuzième qu’is-ont chwèsi. A sawè qui lès deûs preumîs di chaque groupe èyèt lès wit mèyeûs trwèsièmes s’ront qualifiè pou l’ toûr chûvant.
P’tit Louwis d’mèreut aclapè su l’ tablô avou lès groupes èyèt bén-ètindu co ène mîyète di pus dissus l’ groupe G, èl cén dèl Bèljique.
- Ça d’vreut yèsse…, ça va passèr come ène lète al posse !
Il-èst djusse qu’avou dès-advèrséres come l’Égypte, l’Iran èyèt l’ Noûve Zèlande, i n’ duvreut pont awè di trèyin.
P’tit Louwis, di pus-in pus énèrvè, daleut s’ vûdî ène jate di cafeû. Rad’mint, i coureût fé dès crwès ô calandrî èyèt çoula ôzès dates dès 15 èt 21 di jwin. Lès pârtîyes dès bèljes ès’ djouwant a Seattle èyèt a Los Angeles a 9 eûres ô niût. Pou l’ trwèsième, conte èl Noûve Zélande a Vancouvèr, i fôra s’ lèvér timpe avou l’ cominch’mint a 5 eûres du matin.
« Quand on-inme, on n’ compte nén ! » lacheut l’ome dèdja tout foufoûye.
Mins i fôt bén s’ ployî ô calandrî. Quand on pinse qui c’èst l’ preumî côp di l’istwêre dèl coupe du monde qu’i-gn-âra 48 èquipes qui djouw’ront ô mwins trwès pârtîyes. Les wôts diridjants du fotbale trouvît dispus in momint qu’i-gn-aveut branmint trop d’èquipes di l’Europe di qualifîyés pou l’ coupe du monde. Nén âssèz dès-ôtes !
- Viv’mint èl mitan di jwin !
Come P’tit Louwis, nos ratindrons co saquants mwès avou l’èspwêr di vîr qui nos p’tits bèljes diront l’ pus lon possîbe.