- Ça pout arivér ôs mèyeûs ènn’ do. Dji n’é nén trop d’idéyes dissus qwè dji m’ va vos d’vîsér ès’ côp-ci ! Adon, i-gn-âra n’ mîyète di tout. C’èst come si dji don’reu dès nouvèles qui roci s’ront pus râde dès rapèls !
Pou cominchî, dji m’ va vos d’vîsér du toûr di France. Branmint dès djins wèyît Remco Evenepoel dins lès trwès preumîs du class’mint. Maleûreûs’mint, èl coureû a quitè l’ toûr pal pètite uch durant l’ quatôzième ètape. El doube tchampîyon olympique aveut dèdja n’ mîyète di trèyin lès deûs djoûs di d’vant.
In djoû sins come on dit, ça pout arivér a tèrtous, mins nén trwès djoûs d’ chûte. I v’neut d’ lachî prîje an cominchant lès preumîyèrès rampes du Tourmalet èyèt i d’mèreut co n’ cintène di kulomètes. El coureû di Schepdaal s’aveut djusse câssè ène côte ôs tchampionat d’ Bèljique èyèt n’èsteut nén co r’mètu come i fôt. Dispus don, on-a ètou seû qu’èl coureû daleut candjî d’èquipe pou s’èrtrouvér mon Red Bul-Bora. Rola, i va r’trouvér in cèrtin Primoz Roglic èyèt pus’ qui probâbe ène pus fôrte èquipe pou lyi donér in côp d’ mwin.
Du costè dès coureûs bèljes, i fôt rap’lér l’ bèle victwêre da Wout Van Aert dins l’ dérène ètape dissus lès Tchamps-Élysées an-euchant lâchè
Divant li, i-gn-aveut yeû Jasper Philipsen qu’a rèpôrtè l’ preumîyère ètape a Lile, et adon Merlier a Dunkerque èt Châteauroux, Remco ô conte-èl-monte, sins roubliyî Wellens èl djoû dèl fièsse nacîyonâle di no payîs.
Ô rèyon dès mwéjès nouvèles, nos pâl’rons fotbale avou l’Espôrting di Châlèrwè. Après n’ bèle qualificâcîyon conte l’Antwerp, lès gades a rôyes djouwît don a Stockholm, ô deuzième toûr préliminére del Conférence League.
Lôvô, çoula n’ s-aveut nén mô passè avou in zérô a rén. Pou l’èrtoûr du costè du Mamboûr, adon qu’on wèyeut arivér lès prolongâcîyons, lès suwédwès ont mârquè an-éliminant insi lès zèbes. L’aventûre an-Europe ‘steut d’dja finîye !
Nos dalons continuwér avou dès mwéjès nouvèles. Lès Red Lions, du costè du hockèy, èstît trwèsièmes ô class’mint mondiâl divant d’ataquér l’Euro. Après n’ nén awè arivè ôzès d’mi-finâles, lès Red Lions ont disputé dès-ôtès rèscontes pou fini pa s’ classér entrè l’ 5e èt 8e place.
Grâce a ène victwêre face al Pologne, is-ont finâl’mint fini cénquième.
In résultat nén tèrîbe du tout. Il-èst vré qui dès djouweûs avît quitè l’èquipe pou s’ djokér di djouwér an nacîyonâl.
Nos d-arivons ôzès feumes : èl Bèljque a pris l’ 4e place du tchampionat d'Europe di hockey su gazon féminin. Lès Red Panthers ont pierdu leû dérène pârtîye pou l’ bronze mèdâye face a l'Espagne dimègne a Mönchengladbach, an Almagne.
An d’mi-finâle, èles avît stî batûwe di djustèsse ôs shoot-outs (1-1, 2-3), mins tout d’ minme pa l’èquipe qui daleut d’vènu tchampione, c’è-st-a dîre l’Almagne. C’è-st-ène mîyète disbôtchant ètou, puce qu’an 2023, èles avît fini deuzième.
An fotbale, ène ôte mwéje nouvèle (surtout pou lès supôrtèrs dès-ôtès-èquipes), du costè d’El Louvière, tèrtous rouspèt’nut a côse dèl tribune qu’èst résèrvéye ôs visiteûs. Ele èst branmint trop p’tite èyèt minme non réglemantére d’après cèrtins. Dins l’ tout nouvia stâde dèl Louvière, èl tribune pout djusse acueuyî 450 djins di l’ôte èquipe. Ô cominch’mint du tchampionat, lès supôrtèrs du Standard avît r’fusè d’ès’ rinde lôvô. Lès céns di Châlèrwè dins l’ fouléye, s’i avît rindu, mins avou dès fôrtès critiques. A ç’ te eûre, v’la qu’ lès djins di l’Union grogn’nut a leû toûr. Pou chûre, dissus lès résôs, lès céns di Bruges èt d’Andèrlecht voul’nut fé l’ minme afêre. Parètreut qu’is sont sèrès come dès sârdines èyèt risqu’nut di yèsse èspotchîs a tout momint. D’après lès chifes, on n’ duvreut stitchî qui 288 spèctateûrs advèrses èyèt on d’è boure 450. Minme pou lès-ôtocârs, gn-a nén âssèz d’ place. Afêre a chûre, dis-st-i l’ôte !