- Bén on pout dîre qu’èl fotbale toûne bén amon nos-ôtes ! I-gn-a qu’a vîr du costè di l’Olympic, dèl Louvière èyèt du Spôrting di Châlèrwè ! Tout çoula pou l’ province du Énôt !
Cominchons pa l’Olympic qu’è-st-enfin d’èrtoûr mon l’ fotbale profèssionèl bèlje. Èl pârtîye qui s’ djouweut a Stockay a stî deûre èyèt il-a falu qui Roman Ferber mârque dins lès-arèts du djeû, djusse divant èl cèrèje su l’ gatô signéye Rousseau : l’èscôre di 2 a 4 èyèt l’ montéye. Él vî club carolo an D1A, çoula èrmonte ô mitan dès-anéyes sèptante. Bén-ètindu, i fôra agrandi l’ tèrén, mète dès systèmes d’arosâdje èt di drin.nâje ôtomatique èyèt ètou instalér ène noûve tribune.
Pou chûre, El louvière, 19 ans après ès’ disquinde, èrvént an D1A. In vré èsplwèt, pôrtè pal façon d’ vîr da Salvatore Curaba qui a seû candjî s’ n-idèyâl an rèyalitè. Il-a falu l’ dérène djoûrnéye èyèt ça a stî tindu djusse qu’ô-d’bout. Lès leûs ariv’nut an D1A dins-in stâde tout nouvia èyèt avou dès dirijants d’èrnom come Nicolas Frutos, Enzo Schifo èt Silvio Proto. An-è dalant gagnî a Lommel, lès leûs ont rèyussi çu qui wêre di djins an dèwôrs di leûs supôrtèrs n’ârît jamés èspèrè. Mins rachonès, is-ont bén fièstè l’ montéye tout come lès djouweûs.
Quant-a Châlèrwè … lès gades a rôyes l’ont fét ! Après saquantès-anéyes di nwêr pwin, lès zèbes ont r’trouvè l’Europe après leû victwêre an barâdje dissus l’ pèloûse di l’Antwerp qui aveut fini cénquième. R’montès a crèvér pa dès plé-ofs 2 rèyussis, lès carolos ont bouclè l’séson an biatè an s’ qualifiant pou l’ deuzième toûr dèl « Confèrance League », cénq anéyes après leû dérène pârticipâcîyon européyène.
- Dji n’èsteu nén a m’ n- ôje, minme si Keita aveut mârquè. Quand Bayo a égalisè àl 86 ième, dj’é bén pinsè qui c’èsteut fini !
Mins, ouf, bén-eûreûs’mint, Guiagon a slalomè dins l’ dèfance di l’Antwerp pou mârquér l’ but dèl victwêre, èyèt çoula, al 95ième munute di djeû. An fâse di tchampionat, lès zèbes avît seûl’mint fini al dijième place du class’mint. Mins dins lès plé-ofs, is-ont atrapè dèl confîynce pou minme z-arivér al tièsse du class’mint avou chîj victwêres, trwès nuls èyèt seûl’mint in côp batu. I fôt dîre ètou qui l’antrin.neû du spôrting, Rick De Mil, a seû lyeûs donér ène confîynce an leûs possibiltès. Pourtant, d’après lès-èspéciâlisses du fotbale, i-gn-aveut wêre d’èspwêr di lès vîr ès’ qualifiér pou l’Europe. An fâse régulière, l’Antwerp aveut batu l’Espôrting 0 a yin ô match allér, mins lès troupes zèbréyes avît pris leû r’vindje an dalant gâgnî lôvô pa yin a trwès.
C’è-st-ène èquipe qu’âreut d’vu ès’ qualifiér dirèctemint. Dins l’ djeû, il-èst clér qu’is-èstît pus avancès qui l’Antwerp ou minme El Gantwèsse. Mins l’ gros trèyin qu’i-gn-a yeû, c’èst qui Châlèrwè n’a jamés yeû di vré buteû durant ène pârtîye dèl séson. Avou in boun-ataquant ô cominch’mint dèl séson, is-ârît yeû ô mwins di chîj a wit pwints di pus. Odoy Dabbagh ou bén Youssouph Badji ont yeû trop d’ tchances di djouwér adon qu’is n’avît nén leû place … adon qui Nikola Stulic rondjeut s’ frin. On-a vèyu pou chûre qu’il-èsteut capâbe di mârquér, tout come Dan Heymans ètou. Maleûreûs’mint, l’ dérin va s’è dalér èyèt c’èst l’ trèyin di Châlèrwè : pou survikér, come dins branmint di clubs, i fôt vinde dès bons djouweûs !
Pou d’èrvènu al Confèrance League, quand vos lîrèz l’ârtique èl tirâdje du 18 jwin s’ra passè. Quand ôzès pârtîyes, ça s’ra lès 24 èt 31 di djulèt èyèt l’ trwèsième toûr, lès 7 èt 14 d’awous’… avou l’èspwêr di djouwér lès barâdjes lès 21 èt 28 d’awous’. Dès djouweûs qui s’èvont, dès-ôtes qu’ariv’nut. An rèsumé, wêre di condjîs, mins pou lès dirijants n’èrén. Etou, èl cominch’mint dès travôs pou l’ nouvia stâde : ène ancinte avou branmint di fonc.sîyon qui n’ra nén qu’in tèrén di fotbale, mins ètou in temple du spèctaque.