El sèrdjent Garcia, tél in Zoro è-st-arivè !
Ene samwêne après-awè confimè qu’èle ès’ sèpareut di l’antrin.neû Dominico Todesco, l’Union Bèlje di fotbale a fé l’anonce di l’arivéye da Rudi Garcia. L’ome a stî chwèsi pou yèsse èl sélèc.sioneû di l’èquipe nacîyonâle di no payîs.
- S’reut-ce in mieû ? I-gn-a a-z-awè di l’èspwêr.
C’è-st in francès qu’a 60 ans (adon qui l’ôte ènn’ d-aveut qui 39).
L’ome duvra don r’fé brotchî èl flame di nos roudjes diâles divant d’ataquér lès 20 èyèt 23 mârs, lès-ukrénîyns dins lès barâdjes pou d’meurér dins l’ lique A. Mins i d’vra surtout arindjî l’ préparâcîyon di l’èquipe nacîyonâle pou lès qualificâcîyons dèl coupe du monde di 2026 èyèt çoula trwès mwès pus tôrd.
Quand on pinse qui tout daleût ô pus mô èyèt dins toutes lès lines di l’èquipe, ça vout dîre qu’i gn-a du pwin dissus l’ plantche pou l’ nouvia antrin.neû. Rudi Garcia a stî antrin.neû di l'AS Rome di 2013-2016, l'Olympique di Marsèye di 2016-2019 ou Lyon di 2019-2021 ètou. Rudi Garcia aveut divant çoula stî ôzès comandes di Lile di 2008-2013 woù i-gn-aveut in cèrtin Eden Hazard. Lôvô, il-aveut rèyussi èl doublè coupe èyèt tchampionat dins l’ séson 2010-2011.
Avou l'Olympique di Marsèye, èl tèchnicîyn françès a stî finalisse di l'Europa League an 2018, batu pa l'Atlético di Madrid dissus l’èscôre di trwès a rén. Adon, i-gn-a yeû in coûrt passâdje a Al Nassr an Arabîye Sawoudite dins l’ séson 2022-2023. Pou chûre, Rudi Garcia s’aveut r’trouvè a Naples qui l'aveut tapè a l’uch an novimbe 2023. Dispus don, l’ome s’èrtrouveut sins boutâdje èyèt sins-èquipe a-z-antrin.nér.
Eyèt lès djouweûs dins tout çoula ? Quand in nouvia antrin.neû arive al tièsse d’ène èquipe, lès cautes sont rabatûwes dissus l’ tâbe èyèt tèrtoutes co bén.
Dins lès vèstières, dispus saquants mwès, i-gn-a yeû branmint dès trèyins avou lès djouweûs èyèt Todesco. Jason Denayer, qu’a stî blèssè èt qu’èst sins contrat an-Arabîye Saoudite, s’a arindjî avou Al-Fateh, pou câssér ès’ contrat èt a baguè a Dubaï pou wârdér n’ boune condicîyon. Pou cominchî, ça aveut stî l’afêre Courtois, yin dès mèyeûs gâyoles du monde, qu’a skeut èl fotbale di no payîs an n’ v’lant pus djouwér an-èquipe tint qui Todesco s’reut co antrin.neû. I poureut don r’trouvér l’ sélèc.sîyon. Pou chûre, c’èsteut èl côp d’ gueuye da Kevin De Bruyne après l’ pârtîye dèl Bèljique an france. Dins l’ fouléye, c’èst KDB èyèt Romélu Lukaku qu’ont dècidè tous lès deûs d’ènn’ pus djouwér an lique dès Nacîyons.
Mins gn-a nén qu’yeûsses. Dès-ôtes bons djouweûs r’pèd’nut a ç’ te eûre èspwêr.
Michy Batshuayi èst yin dès preumîs, li qui n’a jamés vrémint fét pârtîye dès plans da Todesco an d’merant dissus l’ banc ou djouwant djusse saquantès munutes. Avou l’arivéye da Garcia, i poureut bén awè ène nouve tchance, surtout qu’i-gn’a wêre di bons-ataquants.
El djouweû du mitan Hans Vanaken, èl tripe solér d’or, qui djouweut du tins da Martinez, n’a nén yeû ène mér’seûle munute dispus jwin 2023. Adon, èl djouweû du FC Bruges dwèt ètou poussî in ouf di soulâdj’mint.
Comint n’ nén d’vîsér du frére d’Eden, Thorgan qu’a complèt’mint disparu. I s’èrmèt doucèt’mint dèl ruptûre du ligament crwèsè. Pour mi, l’ pètit frére a s’ place pou spalér l’ataque di l’èquipe nacîyonâle.
En-ôte qu’on n’ pâle wêre, c’è-st-Alexis Saelemaekers qui, a m’n-avis, mèrit’reut n’ tchance. I djouwe su l’ costè, mins sént t’t-ossi bén disfinde qui ataquér. I n’a tout d’ minme qui 25 ans èyèt pou l’ momint, il-èst prustè a l’AS Roma.
Gn-aveut, avou Todesco, branmint di djouweû blèssès. Qwè qui…
Dès-ôtes ni l’intèrèssît nén. On poureut lomér Dedryck Boyata, Jason Denayer, Christian Benteke, Adnan januzaj, Lander Dendoncker, Thomas Foket, Brandon Michele, Divock Origi ou co bén Nacer Chadli.
Cu qui lès èspéciâlisses lomît in payîs di fotbale, èl Bèljique a tcheûte bén bas. Bén oyi èyèt dîre qu’èl jènèrâcîyon doréye come on lès lomeut, a finit trwèsième dèl coupe du monde an 2018. Ca n’ s’ra nén ôjîye di r’trouvér èl place qu’èl payîs aveut dins l’ class’mint. Mins Garcia è-st-arivè…
Escrît èl 14 di fèvrî 2025; eplaidî e rfondou dins l' Rantoele 113