- Dji vos d’é dèdjà pârlè qui dji wèyeû voltî tous lès spôrts di bale èyèt d’balon ! Pourtant …
P’tit Louwis aveut ène con’chance qui wèyeut voltî èl fotbale amèricain. El Djâques en quèstîyon lî aveut propôsè d’è d-aler vîr èl pârtîye à s’maujo. Et bén seûr, i ‘steut pârtant. El supèrbôle d’ès’n-année-cî, c’èsteut èl cénquentième. C’è-st-ène pârtîye di fotbale amèricain. Ele èst l’finâle d’èl séson 2015 d’èl NFL.
El supèrbôle di l’anéye, c’èsteut ène batâye intrè ène fôrte èquipe qui djouweut l’disfinse (lès Denver Broncos) tchampions d’èl confèrence américaine conte lès indomptabes Carolina Panthers, tchampions d’èl confèrence nationâle.
P’tit Louwis aveut dôrmu dissus place, à Dârmèy, mon s’coumarâde Djâques. El pârtîye ès’passeut dins l’gnût di dimègne à lindi. Rén qu’à ètinde lès chîfes, i v’leut d-aler vîr çu qui lès-amèricains lom’nut in spèctaque.
Vos savèz qui 115 mîyons d’amèricains ont wétî l’pârtîye dins leû bwêsse à imâdjes. I faut dîre ètou qui, tènèz-vous bén, lès places d’intrèye sont fôrt tchêres : en mwèyène 6.000 dolars (5.376 euros) èyèt come gn-a 71 088 djins au Levi’s Stadium di Santa Clara en Californie, vos f’yèz in pau l’cârcul. On pâle dès djès olympiques ou d’èl coupe du monde di fotbale, mins vos savèz qu’èl pârtîye ‘steut r’transmètûwe en 34 linwes èyèt 232 payîs dins l’monde. Lès liârds rintèr’nut à crèver. Pou lès publicitès, çoulà cousse cénq mîyons d’Euros pou in spot di 30 sucondes èt come gn-aveut pus di 50 munutes, vos-aurèz aujîye di cârculer.
Djâques aveut mètu l’bwêsse à musique dissus W9, èl tchin.ne francèsse di doneut l’èspèctaque à pârtî di mègnût. Vos d-alèz m’dîre qui c’èst taurd. Mins djusse pou nos-autes. Di l’aute costè di l’ocèyan, èl lèd’mwin lindi, 7 mîyons d’amèricains ènn’ diront nén bouter. C’èst vos dîre come èl bîre a couru : dj’é ètindu pârler d’1,3 mîyards di lites !
Pou l’pârtîye lèye-min.me, P’tit Louwis n’aveut wêre vèyu voltî. I faut dîre qu’i n’con’cheut nén l’afêre. Djâques lî aveut bén èspliquè qui ça s’djouweut en 4 côps 15 munutes. Ca d’veut yèsse deûr pace qui chaque dès èquipes aveut mârquè l’nô di 53 djouweûs qui sont divisès en trwès catégorîyes : l’ataque, èl disfinse èt lès céns qui s’ocup’nut dès fâses di côps d’pîds. Su l’tèrén, i n’pout tout d’min.me awè qui 11 djouweûs au côp.
Bén seûr, çu qu’lès djouweûs d’vît fén, c’èst d’mârquer l’pus d’pwints possîbe en travièrsant l’tèrén pou mârquer in « touchdown » qui vaut chîj pwints ou bén in « field goal » qui d’è vaut trwès, sins roubliyî in « safety » pou deûs pwints.
C’è-st-in machâdje di fotbale èyèt d’rugby à l’sauce amèricaine qwè ! Eûreûs’mint qu’i gn-aveut lès tchanteûs : Coldplay insi qui l’djolîye Beyoncé èt Bruno Mars qu’ont assuré l’èspèctaque à l’mi-timps, sins roubliyî Lady Gaga qu’a tchantè l'hyme nationâl amèricain divant qu’ça n’cominche.
En tout, l’afêre a durè quatre eûres. P’tit Louwis n’aveut nén vèyu voltî l’supèrbôle. Mins il aveut pris dès kulos. Pou yèsse dins l’ambîyance, Djâques aveut ach’tè du coca, dès-éles di poulèt, dès pidsas, dès chips èyèt min.me du pop-corn. Pou l’pètite istwêre, c’èst lès Broncos de Denver qu’ont gâgnî dissus l’èscôre di 24 à 10.