Tchantchès l’ tchèron vint d’aminer ‘ne vôye di tchåfèdje ; il a tapé s’ tchèrète a cou, èt l’ bê r’lûhant tchèrbon s’a rispårdou disconte dèl mohone.
On côp d’ corîhe ! Li dj’vå ratake a sètchî ; tchèron èt tchèrète si pièrdèt å toûrnant dèl rowe.
Lès bot’rèsses si mètèt-st-a l’ovrèdje. Èle s'ont stu d’moussî èl couhène èt s’ riv’nèt so l’ pavêye, avou leûs coûtès cotes et leûs pèzants sabots.
Li bot atèlé ås spales avou deûs fwètès burtèles, Tonton s’a-st-assiou so ‘ne vîle tchèyîre qu’on-z-a apwèrté so l’ rowe. Toutou ramasse lès grozès hoyes avou ‘ne houpe èt tape ås pal’têyes è bot d’a Tonton. Mågré l’ tchèdje qui peûse so sès rins, Tonton, qui s’a dressî, rimplih, a s’ toûr, li bot d’a Toutou.
Fêt-a-fêt′ qui lès bots sont plins, lès bot’rèsses dihindèt-st-èl cåve èt r’mètèt lès hoyes a pont. Après lès grozès hoyes, èle ramassèt lès cotch’tês.
I n’ dimane pus qui l’ fouwaye so l’ pavêye. A côps d’ truvèle, Tonton èt Toutou ènnè fèt-st-on moncê, èle tapèt dèl djèle èt quéques sèyês d’êwe divins, èt on-z-atake a tripler.
Lès pogn so leûs hantches, lès bot’rèsses sipråtchèt l’ mwèrtî a vigreûs côps d’ sabots, li fameûs « côp d’ pîd qui fêt l’ bon hotchêt ». Èle triplèt, tapant quéquefèye on côp d’ lawe a ‘ne djint qui passe.
Adon, après qu’il a stu språtchî èt ratrossî saqwantès fêyes, li mwèrtî èst-a pont. Avou ‘ne foûme di fiér, lès bot’rèsses ènnè fèt dès gros hotchèts qu’on broûlerè, è l’êsse, dizos l’ grande tchiminêye.
Lès hotchèts sont r’mètous èl cåve. On dièrin côp d’ ramon, èt vola l’ pavêye bin nète.
Èl tcholeûr dèl couhène, Tonton èt Toutou, qui s'ont stu r’moussî, hagnèt disqu’ås-orèyes divins dès låtchès tåtes on deût spèsses. So l’ tåve, divant zèles, on veût foumî lès jates di neûr café, tot près d’on bon crås r’modou.