Kitoirdowès imådjes di djins

Ciste ouve ci egzistêye eto divins ds ôtès ortografeyes : Feller-Léonard, accint d’ Transene.

Lucyin Mahin

Kitoirdowès imådjes di djins

rortografiaedje da Lucyin Mahin, e rfondou

2020

Kitoirdowès imådjes di djins

Waitîz waitîz Zanzan Tchinisse
Ki tchoûle come on déprofoundisse
K’ a grand sogne ki l’ Diåle ni l’ apice,
K’ il a djuré
Divant l’ curé. »

Waitîz waitîz Faniye Berta
Hontieuse come li meyacoulpa
S’ galant lyi dit : « çou k’ c’ est po ça
D’ aveur li hé
Po s’ kibetchî ! »^[1]

Waitîz waitîz menir Lwazô
Seur ki çk’ i dit some do credô
Ses båsheles elevêyes comifåt
Ni divrént nén
Rire des ptitès djins. »

Waitîz waitîz Torine Tartele
Fene laide come li petchî moirtel
Biyel lyi dit : « Saiss bén, bebele ?
Waite d’ aler po
Rcure a Boufiou. »^[2]

Waitîz waitîz Noré Poto
Ki dit todi åmen a tot
Meliye lyi dit : « Po vni so m’ schô^[3]
Vs fotroz ene danse
Al grosse Ortanse. »

Waitîz waitîz Tchantchès Pondrome
Fir et franc come li tédeyom
Si crapåde dit : «  Ratind, hê, m’-n ome :
Lomé mayeur
T’ agritchrès m’ cour »^[4]

Waitîz waitîz Silvin Tchedôr
Poenneus come li confiteyôr
— Ene macrale lyi a tapé on sôr —
Rote a baxhete ;
Waite ses betchetes.

Waitîz waitîz Ziré Tobusse
Ki berdele come èn orémusse.
Titine dit ki s’ tchet a des pouces^[5]
K’ il fote a l’ ouxh
Po k’ i nd åye puch.^[6]

1. Rimaedje dins l’ mwaisse modêye : « hé » / « cubètcher ».
2. Rimaedje dins l’ mwaisse modêye : « pou » / « Boufiou ».
3. Mwaisse modêye : « Potou » / « tout » / « chou ».
4. Mwaisse modêye : « mayeûr » / « keûr ».
5. Mwaisse modêye : « Tobus′ » / « ôrémus′ » / « puces ».
6. Mwaisse modêye : « uch » / « puch »