Rilomés Walons
Gn aveut ddja Djôr Limwaisse (Georges Lemaître), èn astrofizicyin walon k’ a skepyî a Tchålerwè, et k’ a tuzé å bing bang divant Einstein. Asteure, fijhans cnoxhance avou :
Polite Delhåye, dabôrd, k’ a vnou å monde a Avrè, dilé Mont, e 1820 et k’ a morou e 1888.
I rèyussit des fwârt belès ètudes à Mont [Mons], Brussele èt Paris. Après, i dvint gazètî èt inture come volontaire å sièrvice di l’ Obsèrvatwâre Rwèyal di Beljike. Lavola, po cmincè, i dène on côp d’ mwin a Adolphe Quételet, et i travaye avou li djusk’ è 1848.
C’ est di ç’ trèvin la (on malåjî timps po l’ Eûrope) k’ i scrît des ârtikes po disfinde les idéyes républikinnes. I pierd si posse èt s’ ènn èva foû dol Beljike po l’ Grande-Burtagne. I voyadje å triviè d’ sakants payis d’ Eûrope èt s’ arète tot d’ minme a Paris doû çki dmeûre cink grossès anéyes, èt travayè avou Abbadie. Oukè è 1854 el Beljike po ovrè å Ministêre dol Guêre, il î fait des rilevès topografikes do payis. Adon, il est nomè mimbe dol sèccion syinces, fizike èt matèmatikes di l’ Académîye Rwèyale di Beljike è 1856. I tire on ovradje fwârt impwartant l’ anéye d’ apès k’ i lume "Histoire du sol de l’ Europe".
È 1857, dandjreus disbeli pa one nominâcion ki lî sonne indjusse, il s’ èbarkéye po l’ Nouve Orleyan. Arivè sul têre amèrikinne. I tchûsit l’ rude vicadje di piyonî èt d’ esplorateûr. E minme tins, i dmore on astronome, on météyorolodjisse èt on zolodjisse plin d’ alant. Il est ossi on ègadjè gazètî .
A ponne arrivé, è 1861, i disfind les dreûts des nwârs èt est minme melè di près a l’ guêre di Sècession. Pus tård, i dvint dirècteur dol prèmîre gazète sicrîte po les nwârs dizo l’ tite è deûs lingadjes "New Orleans Tribune - La Tribune de la Nouvelle-Orléans".
Ladvins, i scrît des clapants artikes po dmander l’ abolicion di l’ esclavadje. Pus tård, si manire d’ ovrè èt ses prîjes di pôsicion po des Unionisses fwârt conus l’ oblidjrè minme a moussè foû des Estats Unis d’ Amèrike po s’ mète a l’ abouche [à l'abri] å Mècsike.
I parvént a intrè dins Mècsico mais il î arive å momint di l’ Espédition do Mècsike. Ça fêt k’ i dut rèbizer èvoye.
È 1868, i gangne li Djamayike et î louwè one pitite cinse dins one comunôtè nwâre djamayikinne nin fwârt lon di Kingston. C’ est did la k’ i mine sakants espédicions su l’ île. Mês su one miète du pus di sèt ans å long, i vike come on nûton po plu fè ses ovradjes d’ astronomîye.
È 1876, Lèyopôl II lî ofure li posse di dirècteur di l’ Obsèrvatwâre Rwèyal di Beljike. I vout bin, et rinture å payis. Adon, i s’ atele a l’ modernisâcion di l’ obsèrvatwâre.
E 1883, i fait one dérène espédicion èn Amérike do Sud divant d’ prinde si pinsion.
Il a scrît brâmint d’ ovradjes su l’ astronomîye, su l’ biolodjîye, et su l’ météyorolodjîye. Mês il a ossi scrît su les matématikes, li folozofîye ,li sociolodjîye èt l’ zolodjîye. Et pîs co dins bin des ôtes dominnes come po ses ovradjes lumès "Bibliographie astronomique" "Uranie Générale", "Étude comparées des facultés mentales des animaux et des humains".
Il a raconté li spoûle di s’ vîye di gazètî dins on live : "My Passage at the New Orleans Tribune".
Li vile di Mont lî a fait on monumint. Il a ossu ene rouwe a s’ no a Brussele.
sicrît li 20 di djanvî 2007