C’èst qui l’Jèrmin.ne voleûve leû-zi fé sès comissions auzès bèguènes ; L’gamin aveûve todi stî croufieux èt s’on n’èst l’sogneûve nén, ça tourn’reûve co todi à misére.
Soeûr Jèrtrûde aveûve choûté ça d’ène orâye, èt aveûve waurdé l’ôte pour r’waîti aux-z-èfants.
Mins èle aveûve bén comprén l’istwêre !
Èle aveûve lèyi coru l’bèrdèlâdje jusqu’au d’bout, divant di dîre » Amen » !
C’n’èst nén à lèye qu’on li aleûve aprinde s’mèsti.
D’sus dîj ans, èle èn-n’aveûve scolé dès bans’léyes di djon.nias.
Èle saveûve comint lès r’toûrner cès p’tits gâtés là, qui n’ont pont d’choûte èt qui sont maîsses à leû maujone. Èle arêt co dès mantches à mète avou c’tila.
Jilbert aveûve dèdja toûrné s’casaque, il aveûve coru r’trover tos lès Saunis, lès cias qui djoûweûve avou zèls d’ô matén jusqu’au gnût.
Jermin.ne, tote mouwéye, n’aveûve nén yeu l’timps d’li d’ner in bètch à s’gamén.
Èle a rad’mint coru s’catchi padri l’âye aus pîds dès montéyes dèl coû…
D’au lon, èle l’a r’wéti moussi è scole. Èle a s’tièsse clincîye su si s’pale èt one mwin au d’zeû d’sès –ouyes po lèyi coru dès gotes su sès massales.
Come dès maîsses, lès Saunis ont corus s’achîre su l’banc autou d’èl sitûve.
Seûr Jèrtrude aveûve sintu l’vènéye, faleûve qu’èle dispaurpîye li binde, les mâchis/ dès-ôtes.
« I vos faut bén choûter c’qu’on vos va dîre don ! « , aveûve dit s’popa.
Èt nosse Jilbêrt si a bén d’vu fé.
Seûr Jèrtrude a èdaumér s’djoûrnéye par on pâtêr divant l’imaudje dèl Sinte Famile : L’Vièrje Marîye achid’al tauve, Sint Djosèf, pad’vant sès plantches èt li p’tit Jésus padvant on djôn.ne di bèdot.
Èle n’a nén yeû l’timps d-z-achèver lès pârdons qui nosse Jilbêrt ataque ;
- Poqwè ç’qui n’va nén à scole ç’-èfant là ?
- Parce qu’il n’y avait pas d’école dans son village !
Jèrmin .ne li aveûve bén dit qu’èle areûve dès mantches à mète avou s’gamin ! Mins nosse Jilbêrt èsteûve dèdjà d’su ène ôte coche :
- Poqwè ç’qui n’a nén di d’vant train come nos-ôtes ?
- Poqwè ç’qu’il èst-à pîds t’chaus ?
- Poqwè ç’ qui ?
- Poqwè ça ?