Intrans èl couhène. Pèrsone. Li feume dèl mohone fêt sûr’mint lès tchambes è la-hôt.
I fêt påhûle ; ine vèrdasse clårté ad’hind dèl fignèsse a p’tits cwårês. I fêt nèt′ ; on veût r’glati dès keûves èt dès stins ; ine frisse mape a cwårês rodjes èt blancs racoûve li tåve.
Li feû keûve è l’êsse, dizos l’ cok’mår di crou fiér qui pind å crama.
Dès deûs costés d’ li tch’minêye, dès tûlês d’ pôrçulinne covrèt l’ meûr èt mostrèt, pondous bleû, dès bièrdjîs èt dès hièd’rèsses.
Ine bråyîre di cotinåde, rodje èt blanke come li mape, coûrt dizos l’ djîvå qui hågnêye quéques plats di stin, on brocalî èt ’ne lamponète di keûve.
A dreûte di li tch’minêye, ine grosse comôde, vièrnêye d’on foncé rodje, èst hop’lêye di r’lûhantès jates.
Al hintche min, in-årmå ; a costé, li hièlî rimplî a make d’assiètes, di platês, di copètes ; pus lon dès cwåtes èt dès pintes di stin pindèt ås croc’.
Qu’èlle èst-av’nante li vîle påhûle couhène, la qui l’ balancî d’ l’ôrlodje clik’têye sins s’ prèsser è s’ hôte kêsse di tchinne !