Moussans è li p’tite plèce qui chèv di tèyåte. Li teûle èst toumêye ; i fêt tchôd ; i fêt bleû d’ foumîre ; ci n’èst qu’ brèyåhes, hah’lådes èt tchaw’rèyes.
Loukans d’on pô pus près ; djônes èt vîs sont-st-assious, strindous onk conte di l’ôte, so dès longous bancs sins poyîre. Dès ovrîs d’vizèt d’ colons ; djônes et wihètes si contèt dès riyot’rèyes ; des-afrontés gamins, li calote so leû tièsse, si tapèt dès-atotes.
On rôlemint d’ tabeûr.
« Qué novèle ? brêt l’ djouweû. Est-ce tot ? »
Li teûle si lîve ; on s’ têt. Tos lès vizèdjes si toûrnèt vès l’ sinne.
Qui s’î passe-t-i ? Wê d’ tchwè, èt portant bråmint.
Dès marionètes amoussèt ou ‘nnè vont, rat’nowes d’on fi d’årca qui passe èn-on croc′ tchèssî è leû tièsse ; èle djåzèt, — avou l’ vwès dè djouweû, — tot pît’lant so l’ plantchî, tot s’ kitapant èt tot k’toûrnant leû tièsse a dreûte èt a gôche.
Mins, po lès cis qu’ loukèt, il avise qui lès marionètes vikèsse ; ces bokèts d’ bwès moussîs avou dès piéces di coleûr, c’èst lès « chèvaliers » d’i-n-a co pus d’ mèye ans qui riv’nèt disfinde leû tchèstê, leû famile, leû-z-oneûr ; c’èst Charlèmagne, li grand-ampèreûr ricrindou d’ lådje èt d’ long ; c’èst Tchantchès avou s’ rodje narène, si bleû såro, si bonète èt s’ gueûye a blame di franc Lîdjwès.
Èl clårté dèl lampe al pètrole, qui r’glatih so l’ v’loûr dès mantês, so l’ keûve bin r’huré dès casses èt des cwîrasses, djônes èt vîs r’vèyèt come èn-on sondje li forfante istwère dè tins passé.
Èt, qwand c’èst qui l’ teûle tome, èlzî fåt on moumint po s’ risov’ni d’ l’ovrèdje èt dès mås d’ tièsse, dès streûtès rouwales èt dè grigneûs tins.