Ine bone annêye

Èn årtike di Wikisource.
Ciste ouve ci egzistêye eto divins ds ôtès ortografeyes : Rifondou walon.
Ine bone annêye
Schoûtez Jean Loos
Ine bone annêye

Avå nos rowes, qwand dèl novèle annêye
On sint ’ne hinêye di wafes èt d’ bons galèts ;
Åtoû dèl tåve, on s’ rassonle po l’eûrêye
Ca l’ novel-an s’ batize d’on crås cafè.
Qwand mèynut′ sone, on s’ rabrèsse, on s’ fièstêye
Èt c’èst plin d’ djôye qu’on-z-ètind rèpèter

A ! dji v’ sohête ine bone annêye,
Crolêye,
Èt dji v’ sohête ine bone santé,
Crolé.

S’on fêt bombance mon lès-ureûs dèl tére
I-n-a dès cis qui Dièw a mèskèyou.
Dès p’tit mamés å blanc visaedje di spér
Tot d’clicotés, ’nn’ è vont-st-a panê-cou.
Qwand mèynut′ sone, on lès veût so l’ pavêye
V’ sititchî ’ne nûle tot v’ dihant d’ine grèye vwès :

Mi, dji v’ sohête ine bone annêye,
Crolêye,
On p’tit valèt,
C’èst dè boneûr après.

Si lès-annêyes si sûvèt-st-a l’ cowêye,
Èle ni fèt nin come lès dj’vås d’ toûrnikèt :
Qwand ’le ripassèt, ci n’èst qu’è nosse pinsêye ;
Ine fèye èvôye, on l’zî deût dîre adiè.
Roûvians-lès don, cès hoyowès-annêyes
Èt po fièstî l’ cisse qui vint d’ataquer,…

Mi, dji v’ sohête ine bone annêye,
Crolêye,
Èt dji v’ sohête ine bone santé,
Crolé.