I.
Vous qui m’è volu t’nu à l’ lache
Come in tchin après vous pindu ;
Vous qui m’è volu prinde la mache
Pace qu’après vous, dj’astos rindu ;
Vous saurez, da, quu l’ cé qui flache,
In bê djoû, c’èst li qu’èst djondu.
Vous saurez co, pou vosse gouvèrne
Qu’in clau tchèsse l’ôte.
II.
Vous qui n’è jamaîs v’lu ployer
D’vant in rin ni d’vant in chichi ;
Vous qui n’ m’ è nin lèyu foyer
Dins vosse tûzadje, pou l’ rasplani ;
Vous saurez qu’ ça n’ su put d’ loyer
Èn-ome rin qu’ paus plaîjis du lit.
Vous saurez co, pou vosse gouvèrne
Qu’in clau tchèsse l’ôte.
III.
Vous qu’avot ène brune pê si tène
Quu quand dj’î rtûze, dju ragadule ;
Vous qu’avot in cwârps du poupène
Maîs la tiêsse pus mak’têye qu’ène mule ;
Vous saurez qu’ l’amoûr toûne a cène
À fwaît qu’à pô, i faut qu’i r’cule.
Vous saurez co, pou vosse gouvèrne
Qu’in clau tchèsse l’ôte.
IV.
Vous qui soutint quu l’ rakeûdadje
Èt l’ racèrçadje, c’èst toutes troûyerîes ;
Vous qu’è crwâ qu’ c’èst d’ vosse bê causadje
Quu vost-ome avot l’ pus dandjî ;
V’ saurez, avu vôs tchaboradjes,
Vos roudjes poûres, èt toutes vôs tchîrîes,
Vous saurez, dis-dj’, pou vosse gouvèrne
Qu’in clau tchèsse l’ôte.
In clau tchèsse l’ôte
Ciste ouve ci egzistêye eto divins ds ôtès ortografeyes : Rifondou.In clau tchèsse l’ôte
In clau tchèsse l’ôte