Les butants èt les royants d’one brète ètur les tchikîs èt les copiutrècîs
Li Rantwèle: - Ci samwinne-ci, li grande novèle avå l’ djint dèl sorcomptince, c’est chûr l’anonçadje pa Intel k’i rtirot, po on moumint, todi, si tchike o Pentium do martchî. C’è-st-on tchamp fwârt tècnike, èt mågrè tot, ça pôreut candjî vosse vicadje di tos les djoûs dimwin u après-nmwin, duwô, Biyèl Dåbî?
Biyèl Dåbî (nost advizeû po l’èconomîye) : - Jusse! Mins, po z-î vèy one miète pus clér, i nos fåt rmontèr sacwantès annêyes è n-èrî. Nin djusk’à Matî Salè, savoz, n’åyoz nole sogne. Jusse one pitite dîjhinne d’annêyes. Li tchike o Pentium, c’èstè l’ dièrinne advancîye divins l’ tècnolojîye des tchikes èlèctronikes. Ille est co bråmint pus fèle ki l’ tchike 486. Li tchike o Pentium, ça vleut dîre po les ptitès djins come vos èt mi li drovadje des uxh des ôtostrådes åzès novèles.
LR: - Kèski c’est dèdjà d’ ça po y-åk?
BD: - Ça vut dîre ki vos pôrîz wårdèr so vosse copiutrèce di måjhone vôs films di fotos, vôs diskes, vôs lîves. Èyèt co rcîre èt ècassètler des imådjes dirèk dèl tévé. Tot ça avu des ustèyes k’on pôreut åjhîymint rwastèr dins on scrinê.
LR: - Èt kèski c’est l’arnoke, dabôrd?
BD: - S’apinse Intel, i gn-è pôreut arivèr one ahike dins l’ovradje des tchikes o Pentium on côp tos les 27.000 ans. Ci sèreut dèdjà bin astchèyu, mi rèspondroz. IBM, li, bassine tot costès ki ça pôreut arivèr bråmint pus sovint k’ ça.
LR: - Mins nérin, on z-ôt brûtyî k’IBM vut fè des niches à Intel. Cwand on vut bate on tchin, on trove todi bin on baston, nonna?
BD: - I fåt todi bin tûzèr k’Intel, c’è-st-on fabricant d’ tchike, on tchikî, come on dit dins l’ mèstî. IBM, c’è-st-on fabricant d’ copiutrèces, on copiutrècî. C’est minme li pus grand copiutrècî å monde. One copiutrèce, c’est tot bonemint on èmantchadje di tchikes èlèctronikes djondant one l’ôte. Ça fwêt k’Intel, c’est l’ayèsseû da IBM. Normalmint, dins l’ comèrce, c’est les pratikes ki cmandèt les ayèsseûs. Li cande est rwè, di-st-i li spot. Avu l’arivadje des tchikes o Pentium, - k’i gn-a k’Intel ki les fabrike -, l’abiançadje des fwaces sèrè one miète candjîye divins l’ mwinnadje IBM / Intel. C’è-st-Intel ki va pwartèr l’ marone, come on dîreut bin. Ça vut dîre k’i vindrè o pris k’i vôrè; ça vut co dîre ki les copiutrèces da IBM sèront pus tchîres ki les ciles da Digital u da Olivetti, mètans. Sins cåzer des rîlas d’après Taiwan èyè l’ Corêye. Ni rovians nin ki l’IBM rèche tot jusse d’on grand radjinsnadje, èt k’ dispûs 1990, il a dvu foute à l’uxh di pus d’ 20.000 ovrîs dins l’ monde ètîr. Asteûre, i lî fåreut on ptit tins por li s’ rihapèr èt s’ riprinde alène.
LR: - C’est po ça dandjreû k’il ont fwêt one soce avu Apple èyè Motorola?
BD: - Têsse k’ây! Motorola, c’est l’ deûjinme udonbin l’ twèzinme tchikî å monde. Apple, c’est mutwè bin l’ twèjinme copiutrècî èto. Li soce k’il ont fwêt zèls trwès, c’est po rcwèri one ôte sôrte di tchike, tossi ovrante ki l’ tchike o Pentium da Intel. S’i rèyussixhèt, ci sèrè Motorola ki les fabricrè, èt Apple èyè IBM les acatrint por zèls montèr des novèlès djèrmêyes di copiutrèces avu.
LR: - Èt là l’ cayèt, là!
BD: - Awè! C’est ça l’ calèma dèl bisbrouye IBM / Intel, mi chonne-t-i.
LR: - Èt bin, mèrci, da, Biyèl Dåbî, èt djusk’al samwinne ki vint dabôrd.
BD: - Oyi. Ada!
Eplaidî so foyes agraptêyes, et evoyî a ene vintinne di djins e moes d' fevrî; après l' mwaisse tecse, gn aveut ci ptit motlî francès-walon cial:
- Riloucoz one miète à c’ bokèt d’ gazète-ci.
- Adon, aprindans èchonne ces mots-ci:
- sorcomptince: informatique
- tchike: microprocesseur, puce électronique
- copiutrèce: ordinateur
- copiutrècî: fabricant d’ordinateurs
- tchikî: fabricant de micro-processeurs
- radjinsnadje: restructuration
- ayèsseû: fournisseur
- calèma: secret
- pratike: client
- rîla: clone
- cande: client
- ôtostrådes åzès novèles: autoroutes de l’information
- copiutrèce di måjhone: PC (Personnal computer)