I.
L'arègne f'za su twèle
Èt l'rôzêye l'ôrna
Du mêye pèrles
Totes ruglatihantes
Mins lu solo m'na
Èt muna èvôye
Lu bêté du cisse parûre
Come mu coûr
Ki bat à s'curompe
Kwand dju crwèse lu vôye
D'one bèle djône feume
Mins èle nu m'rulouke,
Ning on poyèdge
Èt dju sos tot rassètchî
Èt dju d'mans tot seû
Come davanse
II.
L'oûhê tchip'téve
Mins nin tinrûl'mint
C'ésteût on cri d'colére
Ou d' désèspwèr
Kwand dj'ala vèye lu niyå
Il èsteût vûde
On tchèt
O bin one ôte savadge bièsse
Aveût passé por là
Cubin d'nos-ôtes
Nu sont nin
Ku dès p'tits-oûhês
Ki s'fuzèt magnî ?
On loume çoula
Dès-"ajustements structurèls"
Mins c'èst todi lès p'tits
Ki pâyèt l'gros pris.
III.
C'èsteût lu mitan d'l'après-non.ne
L'èfant tchoûla
On r'louka si l'aveût stu
Piké o bin hagnî par one bièsse
Mins i n'aveût rin
Lu mame du s'mame
Duhéve todi
Ku kwand-on-èfant
Brêt, il a sès rèzons
K'on n'pout nin tofinr kunohe
L'èfant brèyéve todi
I n'voléve ning-one calin'rêye
Ni one bobone, ni on frûtèdge
L'ôto du s'mame ariva
Èle moussa foû
Avou on vizèdge tot dusdjèté :
"Djulin vint du s'fé sprântchî par on camyon
Il èst-à l'clinike. I n'vèra nin d'min"
IV.
Lu tching hoûla tote lu nut'
Mins on n'saveût çou ki gn-aveût
Lu p'tite Armèle n'aveût nin rintré
D'one fièsse d'anivèrsère
Kwand k'èle rumna
Èle nu djåzéve pus
Su pére prinda s'fuzik
Èt ala à l'plèce du l'fièsse
On mwêrt
Èt doze ans d'prîzon
V. Lu Plome
Èst-ç' ku c'èsteût one plome ?
Duhans mî , on ploum'tèdge
Mnou d'on savadge colon
O bin d'on mohèt
Èle su pormunéve
Tot sûhant lès mom'mints do vint
Grimpéve o d'hindéve
Èt mu minant à vèyî
Dès cwènes ku dju n'kunohéve
Mins vola k'èle su pona
So on posseû. Loukoz :
La Pintà da Colomb,
Èt nos-alans dèscovri l'Amèrike !
À ç'moumint-là, lu cînsî
Avou s'trak'teûr èt su r'morke
(Duvéve ovré è cisse cwène)
Passa so l'vôye
Mu bê putit ploum'tèdge
Fout k'mahî avou l'êwe èt l'broû
I d'meûre tofinr è mès som'nîs
One putite vêye
Ki voléve duvins l'solo
Èt ki m'môstra one cayète
Du bêté.
V. So l'ête
Dj'aveûs côpé kékès fleûrs
Po-z-aler fé
One vizite à m'grand-moman
Tot moussant so l'ête
Dj'oya lu tchip'tèdge d'on-oûhê
On tchant ki n'èsteût lu ci d'one alowe
Ni d'on råskignou :
È mitan d'après-non.ne
Ç'åreût stu bing-èwèrant
C'èst-alôrs ku, tot binåhe,
Dju vèya deûs pâwions
Ki djowîn l'onk avou-z-èl
Des "Tabacs d'Èspagne"
Dju pwèrta mès fleûrs
À l'pîre du m'grand-ma
One putite priyîre
Pwis dju m'ènnè r'toûrna
Tot moussant foû d'l'ête
Dju côpa kékès florêyès tîdges du lavandin
Ku dj'pona
È l'potche du m' tchumîhe
À l'mâhon, i m'dumonéve
Lu tchant d'on-oûhê
Lu danse du deûs pâwions
L'odeûr du l'lavande
Çou ki fét ku dj'sé
Ku m'grand-mom' èst co voci
Mins d'one ôte manîre.
Haïkous
Haïkous
Haïkous