I.
Les såvadjes ont rivnou. Di nos veyes et viyaedjes,
I n’ dimeure ki des meurs, télfeye on boket d’ toet.
Les bombes on schoyou fel, divins on brut d’ araedje,
Ni leyant rén so pî. Et dj’ avans fwin et soe.
II.
Come ene binde di moxhets brocant avå les poyes,
Les ôbus ont hagnî avou leus betchs di fier.
Et les bales et les bombes, d’ ene årmêye plinne di boys [bourreaux]
Ont flaxhî djus sol tere, nos efants, nos comeres.
III.
Les voyes ont rastroeti, et dins les catoûnreyes
Po-z aler disk’ å drî des dierinnès måjhons,
On s’ epîte so des brikes, des mwelons, des veulreyes
Et dins les trôs k’ les bombes ont cåvlé tot do long.
IV.
Des grands toirdous posteas djondant des åbes sins coxhes
Leyèt pinde come des tchveas leus fis so les costés.
Et s’ on n’ louke nén a s’ sogne, on s’ fwait prinde come des moxhes,
Minme s’ i gn a nole araegne, so l’ arincrin trawé.
V.
Les moirts ni sont pus la. On ls a moenné so l’ aite :
Rezistants et civils, e l’ minme fosse eterés
Dzo ene pire ki dirè, sins mezåjhe d’ ene seule lete
K’ i fåt co bén mori po rtrover l’ liberté.
VI.
Ca ‘l ont hapé nos teres dispu l’ an cwarante-ût
Pu i nos ont reclôs dins on prijhon e l’ air.
C’ esteut e deus meye shijh ; ns avans criyî « gnayûte ! »
Pol grand meur d’ on costé, di l’ ôte, les bateas d’ guere.
VII.
Mins gn a nouk k’ a schoûté cwand ns boerléns « Indjustice ! »
Ni les nosses ni les vosses n’ ont volou d’ nosse payis.
« Li Palestene, ci n’ est k’ on niyåd d’ terorisses ».
Mins vos rezistants, zels : « des heros ! », ki vs av dit.
VIII.
Al grande ôrlodje do tins, i fåt sawè ratinde.
Et l’ Istwere si repete, et todi et tofer.
C’ est nozôtes les dmorants, i gn a nouk a nos l’ prinde.
Zels nos ont colnijhî[1], eyet tchessî nos peres.
IX.
Vosse Godfrwè aveut vnou, divant zels, la meye ans.
Esteut sotnou eto pa tos les princes d’ Urope,
Eyet fé on rweyåme, di Gaza å Liban.
Kibén d’ tins a-t i tnou ? Nén on sieke, c’ est co trop′.
sicrît li 20 di djanvî 2024. Les cénk prumîs hagnons sont redjårbés d’ èn arimé da Émile Meurice « L’ Årdene après l’ bataye », eplaidî dins Singulîs e 1995.