Ça n' si sait k' dispu vénrdi
Ça serè l' derbi, come on dit:
L' Basse-Winchoûle et l' Hôte-Winchoûle
Sont-st eshonne po l' prumî toû
Del fameuse cope di fotbal
Del dicåce del Sint-Vital
Po-z esse djusse djondant l' terén,
I fåt cbouter les vijhéns.
Les rwaitants sont ddja spitants:
Cwè çki ç' serè al mitan !
L' årbite a l' xhuflet al boke,
Et c' est les captinnes k' i houke.
" - N' estans nén-st evoye po piede !"
Dit-st i onk del Basse-Winchoûle.
- Po ça, i fårè k' on vs aide
Respond l' ôte del Hôte-Winchoûle.
Il a prins on coine di trake
Po cwand l' Hôte-Winchoûle atake.
I fåt vey li ptit Fernand
Ki n' va k' so ses di-set ans.
C' est on fel po racassî
Des bales ki vnèt d' tos costés.
Cwand i vs emantche troes betchetes,
Li gôl end a plin ses guetes.
Waitîz l' grande bringue addé lu
On buldozer dins l' corti
I n' fwait nén bon s' i cfroyî,
Ca les cis k' il a coixhî
Ont stî direk a l' ospice.
Dji vôreu ki l' diåle l' apice !
Djondant, c' est l' Gusse da Nenene,
Ki n' est nén pus hôt k' troes pemes.
Vo l' la ki s' fote ene schandeye
Et pu, ki bouxhe do gåtche pî.
Voess bén k' ça mousse, nodidom !
Li veråt di ptit boulome !
Basse Winchoûle, k' est laide pierdante,
Metèt ût omes pa padvant.
Mins il ont bea cabouxhî,
C' est come si l' gôl sereut boutchî.
Et l' bale s' evole dins les coxhes.
Zels sont hagnants come des Boches.
Gn a l' Mareye do Vî Tchårlî
K' a ddja rployî l' paraplu.
Divins s' raedje, nosse viye tchîpete
El prind po ene bayonete.
" - Vos n' vos alez nén fé bate:
Vs n' av' k' a lzî casser les pates !"
C' est come s' i l' årént schoûté
La onk ki tchait dins l' cwåré:
L' årbite xhufele penalti.
" - Ti n' es k' on vindou, don, ti
Va rzè po on barakî,
T' irès raprinde ti mestî !"
Ça finixh deus a zero:
End a k' ça lzî va fé må.
L' årbite a må ses orayes:
Tos les dimegnes, c' est parey.
Et nos viyaedjes, come les Winchoûles,
Kinoxhèt ça tos les ût djoûs.
Mwaisse copeye vaici; riscrît avou kékes pitits candjmints å rfondou