I parèt ke, de t’tout timp, tous les alantours d’Auby ant toudi ri dou viadje d’Auby et doul Djéripont ; pourtant, coume le djot bin nosse mête, gn’ è sôrtu yåke d’Auby.
Dje n’ vous cåzrê ku de çu k’ dj’ê counu.
Pernans d’abôrd les Guillaume, l’onke dou Joseph, k’est touci.
Du cink djonnes oumes, cate ant ètudié et c’èstot kékin : garde-gènèral, injénieur des Eaux et Forêts, conducteurs ; la preuve, c’est loû ki dmeure à Sinte Cècile.
A costé d’zeus gn’ avot les Hubert dont nost’ ancyin instituteur (nosse mwêsse du scole) et s’ frére, k’estot pus lon.
Amon l’Godard, l’Albert est sté percepteur des Posses, l’Edouard, ajant d’ police à Arlon et l’ Lèyon, jandarme (du çà, gn' è dins tous les viadjes, mês pou Auby, c’estot dja yåke).
Chez l’Nemry, i gn’ è én injènieur des mines, sondjèz in pô. Gn’è guêre du viadjes k’ a sårint dire ostant ; le cousin d’ ces Nemry – là, est professeur, loû ; ce n’est ni dja si må.
I gn’avot ossi dvant tous les çis ku dj’ vins d’ dire, l’Abbé Grosfils ki dmeure à Bertrès, pis in frére missionêre.
Chez l’Canau, c’est ène seûr relijieuse ; et les Coumilia, don, ku dj’rouviyos ; la pôve Julie, leu mére avot parvunu à z’ à faire deux gardes-jènèral. Gn’ a n’è yink k’è sté tué an 40 (lu curé doul Djèripont ke dje l’ loumins cand dj’alins à scole.)
Et nosse curé, don, vous, vous pléz fwêre tous les viadjes des alantours, vous n’ trouvez ni l’ parèy ; i gna n’è pon. C’est paske c’ est d’Auby.
Dins les djonnes, c’est co la minme afwêre. Nosse Maurice Grosfils n’è ni yu må non pes. I sôrt d’Auby ossi et les valets d’ nos’ mête : unke est juje supléyant à Palijû, l’ôte, docteur à Etalle et l’ trwajime è rèyussi pou z’ èsse vètèrinêre.
Chez l’ Camile Body, i gn’è co èn’ instituteur et co chez l’ Lucyin Houchard. Et vous m’ direz co k’ i gn’ è rin à Auby. Bin, dijoz putot k’ i gné de ttout.
D’ayeurs, pernez tous les mèyeus entrepreneurs d’ avå-ci, is sôrtant co d’Auby. Le Jules Lalmand, le Lucyin Godard, le Julyin Noël, le Didier François, le Minguet, le Camille Dumay, tout ç’ monde-là est d’Auby.
Et des oumes de mestî, don, gn’ a nè dins tous les cwins, des maçons, et des bons, des mnujîs, chârons, marichås, cordenîs, bouladjîs, tayeurs, martchands d’ vatches et des cultivateurs, don. Trouvez m’ in pô in viadje d’ûsk’ i srint pes malins, pes adrèts ; i gn’ a n’ è pont ; ossi, is n’ ant ni peur du monter les côsses ; il est vrai k’asteure, ils ant tourtous des tracteurs ; ils ant brâmint pus êjî et i su foutant pas mal des cîs dou Fayis et co d’Offagne, pourtant cet-ci se croyant bin ou dzeus des çis d’Auby.
K’ is n’ su trompinjent ni, là ! I gn’ a-nè ou Fayis ossi, én’ hotelier, des cabartîs, minme in martchand d’ pouyètes.
Kestion d’ fiyes, c’est co la minme chôse ; vous trouvrez tout c’ ke vous vléz à Auby, mês surtout des bounes fames de mènadje. Choûtéz m’ bin ! i parèt k’ tous les cis ki n’ a trouvat pon, n’ant k’ à aler à Auby, ils à n-årant yene, ma fwè : dactylos, institutrices, rèjantes mènajéres, etc. Mês surtout, les cîs ki sant par trop malêjîs n’ant k’ à z-aler wâre al Djéripont ; c’est ç’ ke nosse petit Gaby è fwêt et dje l’ ê toudi dit, il est pus malin ke l’ djâbe. I savot bin ke c’èstot ou mitan des bos k’on trouve les pes bèles petites fleurs et dju crwas bin k’ i n’ srè nin dèçu, pask’il è vrêment kwède la pe bèle.
Mês ne vous a fjéz pon , da, Jacques, vous pôréz î aler, à Auby, savéz, pask’à la Djéripont, i gn’ a n-è, séss. Ossi, vous trouvrez bin chûr ce k’ i v’ convint ; demandez à tous les cîs ka n’an sté kêre ; coume ils ont sté bin serve, à cmaçant p’ou pe vî, le Pére Thomas, dûsk’i les è yu, les fames, le Vital dou Javaux ? et l’ pôve Félix Poncelet, à Auby, l’Alphonse dou Tchet, l’ Henri Noël, l’ Albert Barras, Le Popol de l’Ancion, le François dou Dupuis, le Raymond Léonard et l’ Gilbert Renaux, don, c’ est ç’tia k’ è bin rèyussi.
Alez-î gn’a n-è co, gn’ a-n è toudi.
Nosse dwayin, ki n’ a trouvot pon, î è trouvé ene servante ossi ; c’est ene boune, dje vous l’achûre, c’estot l’ coq dou viadje. Oui, dje vous l’rèpète, le çî ki dèsèspère n’ è k’ a aler à Auby, et il årè vite ce ki lî manke. Ossi, dj’èspère bin k’ asteure, vous m’ crwaréz et cand i gna n’årè ki vôrant co rire dou viadje d’Auby, vous l’ dèfindrez à l’z î prouvant qu’ i gn’è d’tout, à Auby.
I parèt mime ke du timp d’ Note Seigneur, ceci dje n’ l’ê ni vû ; c’est k’on l’ raconte, cand il î è fale in bådet pou fêre l’intrée à Jérusalem, on l’avot avoyî à Auby, mais L’ Bon Die ki savot tout, è respondu : gn’è k’ ça ki gn’è ni à Auby, mês, dje l’trouvrê à Bertrès.
De ça, les bådets d’ Bertrès, et is s’mèlrint de rire des çis d’Auby.
Pîre ke ça, î parèt, la grand-grand mére de Note Sint Pére le Pape provanrot d’Auby.
Dje crwas ke t’à vlà assez ; finalmint, vous m’ crwarîz pe.
Note Wikisourd
Papîscrît apoirté pa Marie …, scolresse ås scoles di Bive e moes d' octôbe 2010, et rtapé pa Louwis Baidjot; måy eplaidî.