Les nûtons end avént yeu leu sô do rinde poenne, dimegne et tot, po do poeve et do sé; des cints et des cints ans å lon, les covés cinsîs lzî avént fé soyî leu four; les tcherons les atelént sins balziner, po spårgnî leus tchvås; les bouwresses tapént a l' intrêye di leus grotes des hopeas di disgostantès lokes a rnetyî, a rispåmer, a rakeuze. Et co rçure des lawes et des fions cwand ça n' esteut nén fwait a leu-z idêye!
Sins conter les côpeus d' boûsse ki s' siervént d' zels - les inocins! - po scroter l' ôr des martchands, les sint-crespins des menirs. Et cwand ene sakî si fjheut picî, c' esteut co mwints côps zels k' on tapéve el gayole! I n' avént nén pinsé a må, portant: on lzî dmandéve on siervice, i l' fijhént sins tuzer pus lon. Esse sierviåve, c' esteut leu mestî, leu dvwer, leu planete.
Mins po fini, il avént pô del foice di leus bresses, di leu syince et di leu macralreye po-z avni a coron di tot çou k' on lzî dmandéve.
Et vola k' å dbout d' on tins, on tins k' i fåreut, po l' carculer, ene munute rimpleye di tot li såvion des boirds di totes les aiwes do monde, il end ont yeu jk' al pupe.
Les nûtons do payis ont raploû tertos a ene plaece ki dji cnoxhe bén, å fén mitan di l' Årdene. Vaila, il ont dvizé eshonne et il ont decidé d' end aler. Å Congo.
Il ont ramonçlé leus clicoteas et, al nute, sins pont fé di brut, hay evoye!
Cwand les djins s' ont dispierté, å matén, il ont ataké, come d' acostumance, a fé leus plans pol djournêye:
- I fåt rtaeyî les håyes et råyî ås canadas, dji m' va aler vey les nûtons. - Li bagaedje n' a pus stî fwait dispu troes samwinnes, dji mel va poirter ås nûtons. - Pa, gn a li tchinne di m' velo est schetêye! - Dinez mel, dji passe djustumint pa dvant l' trô dås nûtons. - Purdoz l' posse, tins k' vos î estoz! I n' va pus. Et dijhoz lzî do s' dispaitchî, dji n' vôreu nén manker l' feuyton a 7 eures al nute. - Ådjourdu, dji m' va zweper les couyîs d' årdjint då Baron. Dji m' va dire...
Adon, dins tos les viyaedjes, tos les hamteas tot avå li payis, les djins s' ont rindou conte ki les nûtons avént disparetou.
- Wè sont i co evoye, ces mildieus la? - I sont surmint muchyîs kéke påt! - S' i volèt djouwer avou nos aburtales, i l' vont sinti passer! - C' est vraimint des nawes! Gn a rén d' bon la dvins! - On n' såreut conter so personne, alez! - Tas d' feneyants! Tådje, cwand i vont rivni!
Mins les nûtons n' ont nén rivnou. A ç' moumint la, il estént ddja hute del foû grande mér; k' i sintént des droles di hinêyes, come les djins did ci n' end ont måy sinti; k' il apurdént a lomer des coleurs come les djins di nos djins n' sårént sondjî; k' i schoûtént, tot petés, des airs ki les cis d' avårci n' etindrént ddja.
Å Congo. Ou ôte påt.
So ç' tins la, les djins do payis estént tot pierdous. I s' ont måvlé, il ont stî tot foû di zels. Po cmincî, télmint k' i grognént, i n' ont nén volou ovrer el plaece des nûtons. Mågré ça, l' eveye do mougnî des canadas, do rôler a velo, do rwaitî li feuyton et do haper l' ôr eyet l' årdjint esteut trop foite: il ont rapris a greter.
Et pu, avou li tins, les djins s' ont aroutiné, come todi. Les viyès viyès djins racontént co di tenawete comint çki c' esteut, å tins des nûtons. Mins li fåve esteut disfligotêye, et les efants n' î croeyént pus.
Djusk' å moes passé.
C' esteut li 3 d' awousse. Li monde tournéve come d' abutude: les cinsîs soyént leu four, les feumes fijhént leu bouwêye, les efants djowént al guere, les voleurs sicrotént çou k' i trovént, tot l' monde riwaitîve si feuyton. Et adon...
Les nûtons ont rivnou.
Les djins ont staté tertos. Il ont sayî do rmete eshonne les fligotes del fåve ki les viyès viyès djins avént raconté.
- Vo nos la rivnous, ont-i dit les nûtons. Nos esténs evoye... ene sadju. Et nos avans apris ene ou deus ptitès sacwès.
Dins leus grands saetchs, les nûtons ont apougnî des fiziks, des couteas, des båres di fier. Il ont tchessî les djins foû di leus måjhons, i s' ont ashid so les velos dås efants, il ont vudî les spågne-måyes des menirs.
Il ont atelé nos pîs avou des tchinnes et nos oblidjî a bouter por zels. Li ci ki n' va nén rade assez, ki rnictéye ou ki n' travaye nén a leu môde, il a dreut al sicoreye.
Nos ovrans tertos a nos arachî li cou. Pol moumint, par egzimpe, dji sin li canon d' on fizik eter mes spales. On nûton est pa drî mi. I m' creye dissu tot mougnant do tchôcolåt: c' est lu ki sine tot çou ki dji scrî.
foû di « Sacwantès fåviretes did hute did ci », 1994