On måye d’ agaesse e rvinant di s’ djournêye
Rescontere on côp dins on paxhi,
Fén long stindou, drî ene hourêye,
On ptit coucou k’ esteut coixhî.
El måye d’ agaesse est tcharitåve :
« Hê ! feme, dit-st i, nos n’ polans nén
Leyî droci l’ pôve diåle.
Si nos l’ remoennréns dins no lét. »
Si feme esteut trop anoyeuse –
Trop tcharitåve eto –
Po leyî la l’ coucou.
« Vinoz, Mitchot, dit-st ele ; vinoz, m’ tchere åme,
Vnoz coûtchî avou nos. »
Ele fwait si bén k’ après pô d’ tins,
L’ coucou tchantéve avou Madame.
C’ est l’ måye d’ agaesse k’ esteut contin !
Mins les moxhons, ké raece !
Troes djoûs après, i paret ki l’ Coucou
Filéve avou Madame l’ agaesse.
C’ est Monsieu k’ esteut prou !
Bawitch ! dit-st i, ki l’ Bon Diu les benixhe !
Il a pris m’ feme, c’ est lu ki dj’ plind,
Ca s’ i l’ a fwait po m’ rinde siervice,
I pout bén dire k’ i m’ è rind onk.