Si vous r'wêtèz comifaut la cârte du l'imaudje ciddé pad'zeûs, v' wêrez bin quu Djivèt èst mètûye avu lès causadjes namurwès.
Et come d'èfèt, dins la bote du Djivèt, on cause walon. I gn-è quu, come partout, l'aladje du causer lès p'tits lingadjes duscréche à grands côps. Là co bin qu'i gn-è d'meûre dès vayants pou z-aurder nost-èritance co pou in p'tit timps. Dins ç' payis-là, dj'ans co toudi in scrijeûs, qui dudvint d' Vireûs, in loumé Michèl du Tâ.
Timps dès-anêyes 1500 èt 1600 èt dès, tous lès viadies du ç' payis-là ont sté dusbrôlés paus guêres atur la France èt lès-Espagnols qu' astint an Bèljique. Quand ç' n'astot nin ène ârmêye qui sacadjot, ç'astot l'ôte. Lès djins n'avint pus pont d'alant pou cultiver, èt il alint quèru après d' l'ovradje à Djivèt.
Lès mwaisses taneûs avint bê djeû d' ramasser tous lès loketeûs qui trin.nint avau lès vôyes, èt s' lès fer travayer aus taneries pou in gangnadje du misére. Pôves djins! Leû boûsse alot pus souvint a gayèt qu'èlle n'astot plin.ne.
Dussu ç' timps-là, lès gros ramassint lès caurts, c'è-st-à banselêye. Il avint fwait martchî avu l'armée, pou lès-a.èsser a solés. T' sans bin qu'i gn -avot du rindadje ! Il astint poûris ritches, lès mildjus !
Maîs non pus ç' côp-là, quand c'è sté la rèvolucion du 1789 èt dès-anêyes d'après, ça è pété dès flames, da, dju n' vous dis qu' ça. Qué-n-atèlêye, Jésus' Maria! Surtout quu l' mayeûr d'adon, in loumé Françwès Dèlècole, ç'astot èn-ârdant. Dj'auros volu qu' z-aurîz veû lès gros péter au diâle. Maîs nosse Françwès n'è fwaît ni yène ni deûs: quand i 'nn' è puche oyu après Djivèt, lu sacadjâle è v'nu lès traquer an Bèljique. L'anêye 1783, il è foutu l' feû aus tchèstês d' Baronvèye èt d' Biarin.
Maîs on n' dusrandje nin pou z-arandjer. Il è bin falu qu' lès tanerîes s' rumètinche à toûrner. Du timps d' Napolèyon, ç'astot co toudi zèles qui fournichint lès solés à l'armée.
Min.me co asteûre, brâmint dès djins d'après lès p'tits viadjes d'avaurlà vont travayer tous lès djoûs après Djivèt. Quu, ènut', is su fjèt brâmint bèrwèter pa dès-autobus' qui lès v'nèt ramasser. Çu n'è pus à comparer avu la vicaîrrîe du-d-dins l' timps.