On plaijhi et pasmint d’ tins
Dj’ a des tchvås e l’ måjhon eyet dj’ a-st acaté deus ectåres di paxhi po les mete. Eyet dj’ a-st acaté on tracteur, on djirobroyeu, ene bårire.
Dj’ a fwait mes cloteures mi-minme. Eyet dj’ so bén contin. Dji so tchû mi. Dj’ a mes tchvås avou mi. Eyet dji monte co a tchvå asteure. Normålmint, dji voyaedje avou deus tchvås. Gn a onk ki m’ poite et l’ ôte ki poite mes bagaedjes.
Eyet dji saye di n’ nén ferer mes tchvås ‒ c’ est meyeu por yeusses. Eyet dj’ elzî mete des tchåsseures especiåles po les tchvås. C’ est l’ novele môde. Mins c’ est bén compliké paski, å debut k’ ça a comincî, n aveut cwate cénk markes di solés po les tchvås. Asteure, i nd a bén vint-cénk sôres. Et ça pout ariver ki, a on tchvå, fåt ene marke padvant, ene ôte marke padrî. C’ est bén compliké paski, cwand on comince, el pî sonne [saigne] pacô a l’_avant, pask’ il esteut feré. I n’ fonccione pus normålmint. Les tchvås nén ferés vikèt pus lonmint ki les tchvås ferés. Paski on dit todi ki les tchvås ont cénk cours [coeurs]. Nd a onk douci (dins l’ pwetrene) et nd a cwate dins les pîs.
A tchaeke feye k’ el tchivå mete el pî a tere, ça fwait pompe. Et l’ sonk est rtchessî dins les voennes. Cwand l’_pî est feré, ça va co on pô, mins nén bråmint. Eyet l’ cour a pus målåjhey, eyet el tchivå vike moens lonmint.
lî ås scoles di Bive (scole påzès scolîs) li 12 di nôvimbe 2024