- Dj’èl veûs co
K'èst-c' k'on-ome pout k'nohe du l'vêye, du sès bêtés, du sès djôyes, du sès contint'mints, sins-aveûr gosté l'boneûr dès brès', dès oûyes, dès doûs mots, ku seûle one feume lî pout 'nner ?
Èle èsteût mî ku l'ruhê, êwe ruglatihant è solo, corant so lès pîres, èt lès pèhons potchant è l'loumîre.
Èle èsteût mî ku l'fleûr drovant s'corole, môstrant sès pétales èt sès coleûrs, tapant tot-âtoû su sinteûr.
Èle èsteût mî ku lu s'teûle, r'lûhant è mitan du l'neûre nut', èt aksègnant lu bone kidûhance âs cès ki sont pièrdous.
Èle èsteût mî ku l'cîr do prétimps, apwèrtant l'doûs vint, raminant arondes èt mazintches, ru'nnant lu gosse du tchanter.
Èle èsteût mî ku l'påwion, vol'tant por ci por là, fuzant mårièdge dès fleurs, dunant-st-one îdêye du c'ku polèt-èsse lès andges.
Èle èsteût mî ku l'doûce biche, adawiant l'pormineû avou sès doûs-oûyes, èt èyant sogne du s'djon.ne.
Èle èsteût mî ku l'safîr, k'mahant lès bleûs, lès vièrts, lès djènes, blinkant du totes sès vîviètes, fuzant sès djowês pus ratrèrants k'lès diyamants.
Èle èsteût mî ku l'noûlé, candjant d'aspèt mins d'monant çou k'il èst, môstrant du wice vint l'sofla, f'zant tûzer à l'mér, à l'plin.ne, âs påyizadges du montagne.
Èle èsteût mî ku l'tchanson, f'zant-èclôre lès sintumints, o 'nnant do coûr à l'ovrèdge.
Som'nance dès moumints d'boneûr, po djamåye pièrdous.
Dju n'tu pous roûvî. Tu plèce èst co todi â fond du m'coûr, è mitant d'mès pinsêyes. Nos n'sèrans pus à costé l'onk du l'ôte ; tès lèpes sôdêyes âzès mènes ; nos mins ki n'sépît fwèrt bin çou k'i faléve fé, o nu nin fé ; nos deûs cwèrps kuhossîs p'on mutuèl dèzir, kumahîs po l'tindrèsse èt l'plêzi.
Dju n'tu pous èt dju n'tu vous rouvî.