Divise di payisan

Èn årtike di Wikisource.
Aller à la navigation Aller à la recherche
Tièdôr
Divise di payisan
Li Ban Cloke,  16, li
[ 67 ]
Divise di payisan

On djoû Zande, li fèl paurlî,
Vwèt intrer on gros cinsî
Do tinps qu’il èsteûve a tauve.
Po-z-awè l’air amich’tauve
I lî dit « V’s alez mougnî
On p’tit boket avou mi !
— Ça n’est nin di r’fus », dit l’aute.
I print on grand caurtî d’ taute
Et vos l’avale sins l’ goster ;
I mougne, i bwèt tant qu’i sét…
Come on pourcia qu’on ècrauche.
L’avocat n’est nin binauje
Do l’ vôy bon-z-èt rwèd tchiichî :
T’taleûre noste ome va brotchî,
S’apinse li — Mais i s’arète,
… Li pansard, i taudje one miète
En r’wêtant dissus on plat
One saqwè qui n’èst nin bia,
One saqwè d’estrôrdinaire
On fromadje qui cosse fwârt tchêr,
Deur èt vète, « Si djèl sayerais !
Ça dwèt yèsse do râre, qui dj’ crwè. »
I s’è côpe one trintche, abîye !
Grande et spèsse, nin one bêtchîye
E vos l’ sititche d’on côp d’dint
Et s’ casaque. Co pus rademint :
« Lai la ça » crîye-t-i li maisse,
« Ti n’es nin malin : qui fais-se ?
C’est traite ostant qui c’est glot :
On s’è r’pint, l’ cia qu’è mougne trop ;
Do côp on n’ sait pus rin dire,
On d’vint pus moya qu’one pîre. »
« Ah ! bon Diè » dit l’ payisan
Qui boute é s’ potche tot l’ rèstant :
« Qui dj’ so contint ! Quéne afaire !
Gn’a m’ feume… on nèl sait fé taire ! »

Tièdôr.