L’ôte djoû, one djon.ne fèye m’a atauchi èt m’ dimandè : « Qu’èst c’ qui ça faît di div’nu vî ? ».
Dj’aî stî vraîmint sbarè pa l’ quèstion, pwic’qui dji n’aveu jamaîs pinsè qui dji d’vêreu vî on djoû.
Quand l’ djon.ne fèye a vèyu m’ tièsse, èle s’a èscusè, mins djè lî aî tot l’ min.me dit qui c’èsteut one bone quèstion.
Èt pwis, i m’a v’nu è l’ tièsse qui, prinde di l’âdje c’èsteut one bistoke qu’on m’ fiyeut. Pa côp, dji su sbarè pa l’ djin qui dji veu dins m’ murwè. Mins, c’ djin là ni m’a nin longtimps tracassè pac’qui, final’mint, dji n’ candj’reu nin ç’ qui dj’î aî vèyu po saquants rôyes di mwins’ dins m’ visadje èt on vinte avou dès tâblètes di chôcolat, dji m’ sin bin come dji su.
C’èst fini di m’ fè li r’protche di n’ nin fè m’ lèt quand dji m’ lève ou di n’ nin mougni c’ qui tos lès docteûrs v’lèt qu’on mougne ou min.me di bwâre one bone bîre quand ça m’ prind. Dji m’ done li drwèt di fè à m’ maniére, d’ièsse bwârgnasse à mès eûres ou di passè do timps à n’ rin fè. Pac’qui, po fini, c’èst mi qui tchwèsi di lîre do walon ou ôte tchôse, di r’waîti l’ tèlèvision, di scrîre avou mi ordinateûr jusqu’à totes lès eûres èt di m’ lèvè quand dji vou. Quî ç’ qui s’ tracasse quand dji tchante tot seû dins mi apartemint su dès musiques dès anéyes 60 ? Èt si on djoû, dji su anoyeûs po one afaîre ou l’ôte ou paç’qui dès djins qui dji veu voltî ni m’ vlèt pus veûye, c’èst m’ problin.me da mi tot seû, dji n’ su nin oblidji d’è causè à tot l’ monde … dji faîs co ç’ qui m’ plaît !
Dj’aî vèyu si sovint dès camarâdes moru divant d’awè profitè di cès bons momints là qu’on-z-a en div’nant vî. Adon, qu’on n’ mi vègne nin r’protchi di vikè à m’ maniére. Bin sûr, dji n’aî nin todi ieû tot c’ qui dji v’leu, mins come dj’aî co one trintin.ne d’anéyes divant mi, dj’aî co tot l’ timps di saye di l’awè. Vèyoz, dji su contint di vikè longtimps assèz po veûy passè mès tch’fias do nwâr au quasu blanc, di veûye qui dj’aî aurdè l’ sorîre di m’ djon.nèsse èt di veûye qui m’ visadje n’èst pus ossi lisse qu’a vint ans.
Èt po-z-è riv’nu à l’ quèstion dè l’ djon.ne fèye, djè lî pou rèsponde : dji su contint di div’nu vî pac’qui li viyèsse mi rind pus sâdje èt surtout pus libe. Dji saî fwârt bin qui dji mour’rè on djoû mins tant qui dji su vaîci, dji vou vikè à m’ façon, avou mès prôpès lwès, lès cines di m’ keûr. Dji n’ mi vou nin plinde di ç’ qui n’a nin stî, ni m’ tracassè di ç’ qui n’irè quéqu’fîye nin.
Mins po fini, dji n’ sé nin poqwè c’ qui dji vos cause di tot ça, dj’aî co l’ timps d’î tuzè jusqu’à mès 104 ans …
Prézinté ås tåvlêyes di Cînè avou on ratournaedje e francès