C' esteut å cminçmint des anêyes 1970, cwand dj’ aveu traze catoize ans. Nosse pere mi purdeut avou li po-z aler fé nosse bwès d’ tchåfaedje po l’ ivier a vni.
Po cmincî, on dimegne, on aléve muzurer ou « pezer » les pårts di bwès k’ avént stî markêyes pa les gåres-forestîs. On notéve les chifes des pus belès pårts.
Kékes djoûs pus tård, c' esteut l’ vinte des pårts di bwès al håsse. On î aléve, e-n esperant putete atchter on bon limero. Li håsse atakéve a 50 francs, et on pleut dire disca 1000 francs. Gn aveut des cis a margaye ki fjhént monter les pris, cwand l’ ôte dijheut dsu ene pårt, å risse d’ aveur li pårt so l’ schene.
Kékes djoûs pus tård, après aprobåcion del vinte, on pleut kimincî l’ ovraedje.
Po-z ataker, on aléve rabiner l’ pårt. C' esteut abate les ptitès bôles, les côrîs, les tchånes, et les ôtes pitits bouxhons al cougneye. Avou ces ptits åbes la, on fjheut des fagots po raloumer l’ feu.
On disgoirdjive les pîs dès åbes pask’ i gn aveut sovint des cayôs. Il avént stî tapés la cwand on-z aveut rsårté do tins del guere di cwarante. On rnetyive insi l’ espåce inte les åbes po-z î semer do swele.
Nosse pa aveut ratchté ene tronçneuse avou on platea d» 120 a on taeyeu d’ legnes al pinsion. Ele mi shonnéve mo pezante. Ou bén, c’ est mi ki n’ esteut nén co foirt assez.
On-z atakéve l’ abataedje des åbes. On côp k’ il estént a tere, on les scoxhive avou on sårpea. On wårdéve les coxhes di bôle po-z è fé des ramons. C' esteut ene ocupåcion tipike di Vencîmont.
Pou les ôtes coxhes, on les broûléve. C' esteut m’-n ovraedje. Mins dji dveu ossu singnî les pietches avou on grand grifet. Pu co, dji markéve les tronces tos les metes po ki l’ pere les soye a mete.
Après ça, on findeut les bwejhes avou on marlén et des cougnets. Et pu, on arindjive a taes d’ on mete di hôt. Li longueur dipindeut do nombe di coides k’ on aveut seu fé dins l’ pårt.
On leyive setchi l’ taes so l’ bwès pol moens shijh moes å long.
Asteure, por mi, li meyeu des moumints, c' esteut viè onze eures. I n’ faleut pus mete des coxhes sol feu po l’ leyî ndaler. Insi, on-z aveut on bea moncea d’ braijhisses bén rodjes.
Nosse pere aveut fwait ene sôre di greyî avou deus voletes ås wåfletes. A doze eures, sacwantès cartouxhes dins les braijhes, et des såcisses et do lård inte les voletes, et dji n’ vos di nén li regal ki ça fjheut.
Ki dj’ adoreu d’ aler å bwès avou nosse pere !
I djheut todi « cwand ti fwais do bwès, t’ as tchôd troes côps : on côp cwand tel fwai, on côp cwand tel rintere ey on côp cwand tel broûle po t’ tchåfer. »