Cronike d’ ène minêye/III

Èn årtike di Wikisource.
Ciste ouve ci egzistêye eto divins ds ôtès ortografeyes : Mwaisse modêye (sicrijhaedje espontané)Rifondou.
Lès picadjes avancèt rade…

Mins gn è co todi dès djins ki sont mwês. Dès cés k’ i gn è nu s’ vlèt nin fè pikè. Èt pocwè ?

Il ont peûr. I n' sont nin d’ acwârd du rçûre lu marke Astra Zeneca, ki amon.nrot dès mwês cayèts po nosse cwâr (dès-alots d' sonk [caillots sanguins] dins l’ cèrvê).

Lès vacsinadjes tchèrièt

L’ ahike, c’ èst k’ lès djins choûtèt lès prêtchadjes du dès cés ki n’ î counichèt rin. Des cés k’ ont oyu bwâler on vê, mins ki n’ savèt pus dins ké staule. Mins c’ èst ku : cès djins-la rastaurdjèt tot l’ bazâr.

Portant, lès payis sont d’ acwârd ètur zês. Lu Bèljike èst l’ cinkime pus avancè payis dins l’ chaule dès picadjes. C’ èst bin !

Lès 75-ans èt dpus, c’ èst fwêt. Èt padzo ossi ! On èst dins lès carantin.nîs [quadragénaires] po l’ moumint èt on va cmincè lès djonnes !

A ! lès djonnes ! I lès faut pikè ossi, ca c’ èst lès cés ki sôⁿrtèt brâmint èt ki ruspaurdèt l’ minêye. Bin ây. I f’jèt l’ fièsse, èt c’ èst nin rin !

Dusracloymint

Mins gn è ène boune novèle duspu çu s’mwin.ne ci : lès chifes bachèt. On dusraclôⁿt [déconfine] pitit-z-a p’tit. Oufti ! Gn è dja pont d’ mau !

Lès djins rsôⁿrtèt aus tchèrîyes dès cafès. On-z-èrva dins les botikes (mins nin co po tot). On pout min.me ralè au rèsto.

Al maujon, nin dpus du cate djins a vosse tauve, hin !

Dins lès parks a l’ capitâle, c’ èst l’ folîye dès rabandladjes a n’ è pus fini… Èt pu cwè !?

Lès policîs ont fwat-a fè… èt s’ vlèt-i adji. Ây, mins c’ èst dès rèspondadjes èt dès forbatadjes ki toûrnèt padècôⁿ a êwe du vinêgue. Èt çu n’ èst nin mî !

I faut vikè d’ èspwâr èt s’ rafiyè k’ ça irè mî d’mwin. Èt fè avancè l’ cayèt a choûtant èt a-n èstant drèt dins sès botes.

On rdroûvrè lès arèyopôⁿrts : boune novèle po lès voyadjeûs !

Lès condjîs s’ anoncèt bin. Ttafwêt duvrot rprinde come duvant po l’ mwès d’ sètimbe. Dijans todi kécfîye !

Lu minêye san.ne ducwèli. On l’ lêchrè ‘nn’ alè sins bin chûr lu ratnu. Mins èle put co radârè avou dès vîrûsses ratchandjès et swîmès ku lès picadjes nu rascovrèt nin. Alôⁿrs´, continuwans a sîre lès djèsses garantichantes po waurder distance avou l’ plôke.

Dêrine minute

L’ Eûrope vint au scoûr dès pus pôⁿves payis. On avoye dès masses a l’ Azîye. Dès picadjes ossi.

Mins a costè d’ ca, lès Flaminds ont peûr : gn è on sôⁿdârd k’ è manecè [menacé] on virolodjisse avou on fizik. On kîrt après lu dins on bwès d’ 12 èctâres. T-i possipe, bin chûr !? C’ è-st-a n’ nin creûre, douwô ? Lès djins duvnèt fôⁿs a loyè.

Boun èstè, bons condjîs ; purdèz sogne du vozôⁿtes tortos !

Note Wikisourd

sucrît lu E.G., lu 22 d’ mêy 2021, racrauchè è rfondu po l’ gazète « Li Rantwâye », pu rudusfondu ciddé, èt ruferlijè tot chinant èn acsint d’ après l’ Bork.