Cour d’ agnon/I

Èn årtike di Wikisource.
Aller à la navigation Aller à la recherche
Emojione 270F.svg Ciste ouve ci egzistêye eto divins ds ôtès ortografeyes : Mwaisse sicrijhaedje (1888) — Feller.
I
rortografiaedje da Lucyin Mahin
Ake I

On cåbaret; å mitan å fond: li poite del rowe; a gåtche: ene poite, a droete: ene finiesse so l’ rowe. Li candjlete a droete del poite då mitan. Des tåvleas et des tcheyires come divins les cåbarets.

sinne 1

FIFINE (tote seule, avou broushe et saeyea)


Sinte Viedje ki dj’ so nåjheye! mins dj’ a cåzu fini ;
Dji m’ va vite dixhombré, ca les ombådes vont vni.
( Ele tchante tot frotant)

Tot come on clå d’ keuve
Totafwait rlurè,
Cwand c’ est mi ki schove
Fåt k’ tot soeye bén nete.
Arincrin, poûssire,
Tchinisse et ploumtion
Del måjhone etire
Po l’ djoû d’ ouy bagront.

(Ele s’ arestêye on moumint pu s’ mete a tuzer).

Mins portant, cwand dj’ î tuze, dji so cial bén dseulêye!
Nolu n’ pinse måy a mi ; dji n’ so rén mi, c’ est vraiy,
K’ ene pôve pitite crapåde ki nou galant n’ vôrè !
Si Djôzef l’ euxhe sepou… Mins måy i n’ el sårè…
Seur k’ i m’ åreut rbouté, bén k’ cial å fond di m’ cour
Dji n’ tuzrè måy k’ a lu; ci serè m’ seule amour.
E catchete di Mareye, dji m’ console tot plorant ;
Li Bon Diu freut ene bele gråce bén seur tot m’ rihoucant.

(Ele tchante tot plorant).

Tot come on clå d’ keuve
Totafwait rlurè,
Cwand c’ est mi ki schove
Fåt k’ tot soeye bén nete.
Arincrins, poûssires,
Tchinisses et ploumtions
Del måjhone etire
Po l’ djoû d’ ouy bagueront.

sinne 2

FIFINE — DJODJET

DJODJET (tot-z intrant).

Oho ! vs tchantez dedja, c’ est vraiy ki c’ est djoû d’ fiesse !
La, k’ dj’ arawe, vos plorez ! K’ avez vs co ene feye e l’ tiesse?
Djans ! djans ! vola k’ c’ est tot… mi pôve pitit poyon!
(Ele li vout rabressî).
Ni so dj’ nén come vosse mame? ‒ ki l’ bon Diu lyi soeye bon ‒
K’ avez-vs, djans ! dihez mel ; c’ est co seur po ene tchintreye.
Dji m’ laireu côper l’ doet ki c’ est vosse sour Mareye !
Iy ! Mondju ! ké displi ! Leyîz l’ po çou k’ elle est.
Djans ! Racontez m’ ene gote tos vos ptits screts mawets.

FIFINE (a pårt).

Vs estoz trop fene por mi !
(a Djodjet) Cwè çki dji vs pôreu dire?
Dji n’ a rén, mi, Djodjet. Voloz vs on vere di bire ?

DJODJET

Dji n’ a rén do monde soe.

FIFINE (a pårt tot-z alant a l’ candjlete).

Elle inmreut mî l’ peket,
Do costé del botaye, gn a ses ouys ki boirgnèt.
(a Djodjet)
Volez vs ene pitite gote ?

DJODJET

Awè; c’ est bon po ls ouys,
Ca dji n’ el sai oder. Mins les djins, po l’ djoû d’ ouy,
Sont pår si måpinsants !

(Fifine lyi vude li gote).

(Djodjet trimpe si pôce e vere, li mete e s’ boke et frote si ouy avou èn ôte doet).

Dji n’ el di nén por vos.
I m’ traitèt d’ ragognasse ! (djeu) Va ! dji les hai tertos. (djeu)
Mi seu ratrait, c’ est cial, (ele boet on côp so l’ costé).
Et vos avoz bén toirt (djeu)
Di m' voleur co catchî çou ki vs tourmete si foirt.
Est ç’ vosse sour ? Djans ! djhoz mel ! Pa ! tolmonde el sait bén !
Pa ! c’ est vos k’ est s’ siervante ! Ele vos moenne come si tchén.
Ele n’ åreut nén bea djeu si dj’ esteu-st e vosse plaece;
Por seur ki dj’ lyi rindreu tote li manoye di s’ pîce.
(Ele boet).
(Souwêyemint) Ç’ n’ est nén po vs efouwer, savoz, ki dj’ di çoula.
Ki l’ Bon Diu m’ è prezieve, dji n’ so nén d’ cisse sôre la.

FIFINE (inte deus airs).

Neni, nos l’ savans bén.

DJODJET

Mins çou ki m’ fwait del poenne,
C’ est di vs vey si dseulêye ; loukîz, cwand dj’ esteu djonne.
Edon (ele riletche li vere)

FIFINE

Ki gn aveut i ?

DJODJET (tot riyant).

Dji m’ è sovén todi !
Dj’ aveu co traze galants! Schoûtez, i s' fåt dvierti.
N’ avez vs måy avou nouk ? (Fifine ni respond nin).
Djans don ! respondoz ene gote !

FIFINE (trisse ).

Neni, Djodjet, neni.

DJODJET

Alez, vos estoz ene sote!
C’ est l’ plaijhi del djonnesse, mins çoula n’ a k’ on tins…
Ossu, kî s’ endè passe, dji vs di ki ç’ n’ est nén ene djin !
Les femes, veyoz vs, Fifine, ont co trazès piceures
Po-z adawyî les omes. Å galant, ele vos fjhèt croere
Ki l’ poye pond so les sås. Tot fén parey k’ å ståve
Ele djouwèt-st avou zels ; i sont pår si båbôs

(Ele tchante)

Cwand dj’ esteus djonnete,
Dji m’ è sovén bén,
A tchaeke, ene clignete,
Çoula n’ costéve rén.
So m’ doet par dozinnes
Dji vs les fjheu rivni,
Tertos stént da minne
Grands, gros, maigues ou ptits.

FIFINE (a pårt)

Veyez vs li viye souwêye ! Djåzez m’ co des bigotes !
(Ele va-st a l’ candjlete).
Po ndè saveur pus long, dji lyi va rtaper ene gote
(a Djodjet) Vo nd irez nén so ene djambe ? (Ele lyi vude)

DJODJET

Neni, vs avez råjhon,
Mins c’ est po mi stoumak (a pårt) Cwand n’ cosse rén, c’ est si bon.

(Ele tchante)

C’ est ene grosse biestreye
Di s’ mete on loyén
Les omes fijhèt l' minme
I n’ nos inmèt nén
Vos estoz djonnete
Sovnoz vs è don bén
A tchaeke, ene clignete
Çoula n’ costêye rén.

(Ele vude si gote)

FIFINE

Mins avou tot çoula, vs avoz dmanou djonne feye

DJODJET (d’ ene air devot)

N’ a-dj’ nén l’ Bon Diu por mi ? Dj’ a si bon cwand dj’ el preye.

FIFINE (a pårt)

Awè pask’ i fåt bén. Cwand l’ diåle est divnou vî…
Tolmonde kinoxhe li spot !

DJODJET
Gn a l’ salut k’ est cmincî
Dji m’ såve dire troes påters

(Ele mete si vere so l’ candjete et vout sôrti, cwand Djôzef et Bergopzoom intrèt).