Si vos lijhoz cist artike ci, c’ est k’ vos estoz skepyî on djoû ; såf si vs estoz ene copiutrece ubén ene ôte sacwè ki n’ vike nén. Tertos avans stî, li djoû d’ nosse skepiance, codåné a vicance ey al moirt, ki l’ shuve. Li tite d’ èç årtike ci (Codåné a vicance), c’ est l’ ratournaedje di l’ inglès e walon d’ on tite di muzike (Doomed to Live) djouwé pa : Mokadelic. Cisse muzike inla fwait parteye del binde-son[1] del fouyton napolitin[2] : Gomorra. Dji n’ a nén tot rwaitî d’ èç fouyton la, mins dji trove k’ el binde-son dimane foirt egadjante, aprume k’ elle est wargnasse.
Codåné a vicance, c’ est d’ aboird esse codåne a surviker. El sorvicaedje a todi dimané l’ pus grande råjhon des vicants po viker. Divinltins, on s’ diveut-st adayî a nosse evironmint ; enute, on doet seulmint s’ adayî al societé. Dj’ ô bén : li societé, asteure, ricandje el såvadje nateure davance. S’ i shonne ki tertos pout esse bén ahessî, çoula n’ est nén come di djusse el cas. Bråmint des djins sol Daegne sont co todi afamés. Houte di çoula, tchaeconk di nozôtes pout divni pôve come on rat d’ eglijhe eyet fini sol rotoe. Dji n’ va nén sayî d’ vos fé l’ moråle tot dijhant : « Vos dvoz absolumint diner des liårds ås pus pôves ! Sinon vs estoz des mescreyants eyet c’ n’ est nén bén ! » Vos fé l’ moråle sereut mo loignåd. E-n efet, dji dene cåzumint måy rén a nolu. Dji so çk’ on lome voltî : on pinsami, on pice-crosse u core on « chmerlape », po uzer on ptit påter d’ pourcea wice l’ etimolodjeye est neyerlandesse. Çki dji vou dire c’ est k’ nos nos dvans coråyî tot seu come des grands. Dj’ etind k’ vos l’ savoz d’dja. Sacwantès djins mi vont ossu acertiner k i gn a todi, å moens, ene sakî ki serè todi rola po tchaeconk. Oyida k’ ces djins la ont råjhon. Mins nerén, dins ene mierdjinne societé, mwintès djins prefernut tirer leus plans.
Epwis, codåné a vicance, c’ est eto viker dins on monde wice ki homo homini lupus est ([WA] Les djins sont des lovresses etur zels[3]). Minme si asteure, al atake do vint-ey-ininme sieke eyet dins nosse societé, on-z a pus d’ risse di s’ fé tchicayî på transixhance do prezint eyet l’ pôzetait avni, ki ns rawårde tot n’ ayant nén håsse, ki di s’ fé golafer pa des leus. El vicance n’ est nén åjheye. A cåze di çoula, bråmints vôrént voltî ridivni des efants. Pocwè fé ? Po ridivni ignorant ? Po piede ses libertés ? Po viker dins l’ mintreye ; dj’ ô bén, viker dins on monde ewou Sint-Nicolai egziste ? C’ est ça l’ devudindje a cisse problinme la ? S’ agranci d’ awè crexhou, virpus[4] s’ agranci d’ awè viké ?
Infén, codåné a vicance, c’ est puvite s’ dimander pocwè ns estans roci ? Ces djinres d’ kesses la ki n’ ont, motoit, nole response. Les rilidjons ns avént forbaté d’ sayî d’ aploure des responses. Tenawete, cåzu tot çk’ on-z a dit esteut få. Ns estans les efants då Bon Diu ey on-z irè å paradis padri nosse revoyance ? Nenni, is sayront d’ nos mindjî : certinnes biesses eyet çk’ estént nos inzimes. Li Daegne est plate eyet c’ est l’ cinte di l’ univiers ? Nenni, nosse planete n’ est k’ ene bole ki toûne åtou do Solea. El Daegne n’ est k’ on xhoutsiplou.