Coûr d’ognon/I

Èn årtike di Wikisource.
Aller à la navigation Aller à la recherche
Emojione 270F.svg Ciste ouve ci egzistêye eto divins ds ôtès ortografeyes : Mwaisse sicrijhaedje (1888) — Rifondou walon.
I
rortografiaedje da Lucyin Mahin
Ake I

On câbarèt, â mitan â fond li pwète dèl rowe. A gôche, ine pwète, a dreûte ine finièsse so l'rowe. Li candeliyète a dreûte dèl pwète dâ mitan. Des tâvlês èt dès tchèyîres come divins lès câbarèts.

sinne 1

FIFINE (tote seûle, avou breûsse èt sèyê)


Sinte Vièrje qui dj’ sos nâhèye! mês dj’a quasi fini ;
Dji m' va vite dis’hombré, ca lès ombâdes vont v'ni.
( Èle tchante tot frotant)

Tot come on clâ d' keûve
Tot-a-fait r'lûrè,
Qwand c’èst mi qui heûve
Fât qu' tot seûye bin nèt.
Arincrès, poûssîres,
Tchinis’ et ploumetions
Dèl mohone ètîre
Po l' djoû d’oûy bagueront.

(Èle s'arèstèye on moumint pwis s' mèt’ à tuser).

Mês portant, qwand dj’î tûse, dji so chal bin d'seûlèye!
Noulu n'pinse mây a mi ; dji n' sos rin, mi, c'èst vrèye,
qu'ine pôve pitite crapôde qui nou galant n' vorè!
Si Josèf l'eûhe sèpou… Mês mây i n'èl sârè...
Sûr qu’i m'âreût r'bouté, bin qu'chal â fond di m' coûr
Dji n' tûserè mây qu'à lu; ci sèrè m' seûle amoûr.
È catchète di Marèye, dji m' console tot plorant ;
Li bon Diu f’reût 'ne bèle grâce bin sûr tot m' rihoukant.

(Èle tchante tot plorant).

Tot come on clâ d' keûve
Tot-a-fêt r'lûrè,
Qwand c’èst mi qui heûve
Fât qu'tot seûye bin nèt.
Arincrès, poûssîres,
Tchinis′ èt ploumetions
Dèl mohone ètire
Po l' djoû d' oûy bagueront.

sinne 2

FIFINE — DJODJÈT

DJODJÈT (tot-z-intrant).

Oho! v's tchantez dèdjà, c'èst vrèye qui c'èst djoû d' fièsse !
La, qu' dj’arawe, vos plorez! Qu'avez-v’ co ‘ne fèye è l’ tièsse?
Djans ! djans ! vola qu' c'èst tot… mi pôve pitit poyon!
(Èle li vout rabrèssî).
Ni sos-dj’ nin come vosse mame? qui l' bon Diu lî seûye bon
Qu'avez-v’, djans ! dihez mèl ; c'est co sûr po 'ne tchin’terèye.
Dji m' lêreû côper l' deût qui c'èst vosse soûr Marèye!
Èy, mon Diu, quél displi ! lèyîz-l’ po çou qu'èlle èst.
Djans ! racontez-m’ ine gote tos vos p'tits s’crèts-mawèts.

FIFINE (a pârt).

V's-èstez trop fène por mi !
(a Djodjet) Qu'èst-c’ qui dji v's pôreû dîre?
Dji n'a rin, mi, Djodjèt. Volez-v’ on vère di bîre ?

DJODJÈT

Dji n'a rin dè monde seû.

FIFINE (a pârt tot-z-alant a l’candeliyète).

Èlle inmereût mî l’ pèquet,
Dè costé dèl botèye, gn-a sès-oûy qui bwèrgnèt.
(a Djodjèt)
Volez–v’ ine pitite gote?

DJODJÈT

Awè; c'est bon po l's-oûy,
Ca dji n’èl sé oder. Mês lès djins po l' djoû d'oûy
Sont pôr si mâ-pinsants !

(Fifine lî vûde li gote).

(Djodjèt trimpe si pôce è vère, li mèt’ è s' boke èt frote si oûy avou 'ne ôte deûgt).

Dji n'èl dis nin por vos.
I m' trêtèt d' ragognasse! (djeû) È l’ rowe, dji lès hés tos’. (djeû)
Mi seûl ratrêt, c'èst chal, (èle beût on côp so l' costé).
Èt vos avez bin twèrt (djeû)
Di voleûr mi catchî çou qui v' tourmète si fwèrt.
Est-ce vosse soûr ? Djans ! d'hez mèl ! Pah ! tot l' monde èl sét bin !
Pah !, c'èst vos qu'èst s' sièrvante ! Èle vis monne come si tchin.
Èle n'âreût nin bê djeû si dj’èsteûs-st-è vosse plèce;
Por sûr qui dj’ lî rindreûs tote li manôye di s' pèce.
(Èle beût).
(Souwèyemint) Ç' n’èst nin po v's-èfouwer, savez, qui dj’ dis çoula.
Qui l' bon Diu m'è présèrve, dji n' sos nin d' cisse sôre-là.

FIFINE (inte deûs-êrs).

Nèni, nos l' savans bin.

DJODJÈT

Mês çou qui m’ fêt dèl ponne,
C’èst di v' vèy si d'seûlèye ; loukîz, qwand dj’èsteûs djonne.
Èdon (èle rilètche li vère)

FIFINE

Qui gn-aveût-i ?

DJODJÈT (tot riyant).

Dji m'è sovins todi !
Dj'aveû co traze galants! Hoûtez, fât s' divèrti.
N'avez v' mây avou nouk ? (Fifine ni rèspond nin).
Djans don ! rèspondez 'ne gote !

FIFINE (trisse ).

Nèni, Djodjèt, nèni.

DJODJÈT

Alez, vos èstez 'ne sote!
C'est l' plêsir del djonnèsse, mês çoula n'a qu'on timps…
Ossu, quî s'ènnè passe, dji v's dis qui ç' n'èst nin ‘ne djint !
Les feumes, vèyez-v’, Fifine, ont co trazès piceûres
Po-z-adawî lès-omes. Â galant 'le vis fèt creûre
Qui l' poye pond so lès sâs. Tot fî parèy qu’â stå
Èle djouwèt-st-avou zèls ; i sont pôr si bâbôs

(Èle tchante)

Qwand dj’èsteûs djonnète,
Dji m'è sovins bin,
A chaque, ine clignète,
Çoulà n' costéve rin.
So m’ deûgt par dozinne
Dji v' lès féve rim’ni,
Tos’, c'èsteût da minne
Grand, gros, mêgue ou p'tit.

FIFINE (a pârt)

V èyez-v’ li vèye souwèye ! Djâsez-m’ co dès bigotes !
(Èle va-st-a l’ candeliyète).
Po ‘nnè savu pus long, dji va lî r’taper ‘ne gote
(a Djodjèt) Vo ‘nn’ îrez nin so ‘ne djambe ? (Èle lî vûde)

DJODJÈT

Nèni, v’s-avez rêson,
Mês c’èst po mi stoumac (a pârt) Qwand ‘le n’ cosse rin, c’èst si bon.

(Èle tchante)

C'è-st-ine grosse biès’trèye
Di s’ mète on loyin
Lès-omes fèt parèy
I n’ nos inmèt nin
Vos èstez djonnète
Sov’nez–v’s-è don bin
A chaque, ine clignète
Çoulà n’ costèye rin.

(Èle vûde si gote)

FIFINE

Mês avou tot çoula, v’s avez d’manou djonne fèye

DJODJÈT (d’ine êr dévôt)

N’a-dj’ nin l’ Bon Diu por mi ? Dj’a si bon qwand dj’èl prèye.

FIFINE (a pârt)

Awè pace qu’i fât bin. Qwand l’ diâle èst dim’nou vî…
Tot l’ monde kinohe li spot !

DJODJÈT
Gn-a l’ salut qu’èst k’mincî
Dji m’ sâve dîre treûs pâtêrs

(Èle met’ si vère so l’ candeliyète èt vout sôrti, qwand Josèf èt Bergopzoom intrèt).