Ç’asteut o kiminçmint des anêyes 1970, cand dj’ aveu trêze catôrze ans. Nosse pére mi purdeut avu li pou-z aler fè nosse bwès d’ tchåfadje pou l’ iviêr a vni.
Po kimincî, in dimègne, on aleut mzurer ou « pezer » les pårts du bwès k’ avint sti markêyes pa les gâres-forestîs. On noteut les chifes des pus bèlès pårts.
Kékes djoûs pus tård, ç’asteut l’ vinte des pårts du bwès al håsse. On î aleut, a-n espèrant putete achter in bon numèro. Li håsse atakeut a 50 francs, et on pleut dire jusca 1000 francs. Gn aveut des cis a margaye ki fjint monter les pris, cand l’ ôte dijeut dsu ène pårt, å risse d’aveur li pårt su l’ chine.
Kékes djoûs pus tård, après aprobåcion del vinte, on pleut kimincî l’ovraedje.
Po-z ataker, on aleut rabiner l’ pårt. Ç’asteut abate les ptitès bôles, les côrîs, les tchånes, èt les ôtes pitits buchons al cougniye. Avu ces ptits åbes la, on fjeut des fagots pou ralumer l’ feû.
On disgwardjeut les pîs dès åbes pask’ i gn aveut souvint des cayôs. Il avént stî tapés la cwand on-z aveut rsårté dou tins doul guere di carante. On rnetieut insi l’espace inte les åbes po-z î semer dou swâye.
Nosse pa aveut rachtè ène tronçoneûse avou in platia di 120 a in tayeû d’ bwès al pinsion. Ele mi chon.neut bin pezante. Ou bin, c’est mi ki n’asteut nin co fwârt assèz.
On-z atakeut l’ abatadje dès åbes. In côp k’il astint a tère, on les scocheut avu in sårpia. On wårdeut les coches di bôle pou-z è fè des ramons. Ç’asteut ène ocupåcion tipike di Vèncîmont.
Pou les ôtes coches, on les brûleut. Ç’asteut m’n ovradje. Mês dji dveu ossi singnî les piêtches avu in grand grifet. Pîs co, dji markè les tronces tos les mètes pou ki l’ pére les soye a mète.
Après ça, on findeut les bwèjes avu in mièrlin èt des cougnets. Èt pîs, on arindjeut a tas d’in mète di hôt. Li longueûr dipindeut dou nombe di cwâdes k’on aveut seû fè dins l’ pårt. On lèyeut sètchi l’ tas su l’ bwès å mwins chî mwès å long.
Asteûre, pour mi, li mèyeû des momints, ç’asteut vè onze eûre. I n’ faleut pus mete des coches su l’ feu pou l’ lèyî ‘nn’ aler. Insi, on-z aveut in bia moncia d’ braijis’ bin rodjes. Nosse pére aveut fwait ène sôre di grèyî avu deus volètes a wåflètes. A doze eûres, sacwantes cartouches dins les braijes, èt des såcisses èt dou lård inte les volètes, èt dji n’ vos di nin li règal ki ça fjeut.
Ki dj’adoreu d’aler o bwès avu nosse pére !
I djeut toudi « cand ti fwais dou bwès, t’ as tchôd trwès côps : in côp cand t’el fwai, in côp cwand t’el rinture èt in côp cand t’el brûle pou t’ tchåfer. »
Tecse prezinté ås scoles di Bive do doze di nôvimbe 2024 (scole pås scolîs); li mwaisse sicrijhaedje a stî fwait avou ene kinoxhance di l' accint d' après Vencîmont, mins tot s' siervant des ratourneus éndjolikes.
Pol risrijhaedje cial, å DIE, nos avans tchoezi l' cogne di Djedene (-eu) purade ki l' cogne di Biarin (-èt) (ALW 2 notûle 108).