En plein mitan du nosse t'Ardenne,
Sa trûve lu gros hargneux Libin
Do l'novalle an, à l'Saint Etienne,
La bawîrîe fait réglemint.
I gn'è des ci qu'i faut qu'on loye
Des ôtes courè, tos f'gèt faction.
Lu viadje chaurè su des grandes voyes,
Denne enn exempe du s'mette d' action.
Libin qu'è in grand territoire,
S'est volu s'tinde do bon costè
Bin long rîe d'l'Homme qu'on lème « aiwe noire »,
Nu d'vant nin prinde trop d'libertè.
T'tavau l'grand fond aux dères brouyires
Et des sombes bouès, c'est l' leu voci,
L' coirbea volà; qué laide orîre !
Ç'aurot stî s'mette à leu merci.
Su l'plin do d'zeu qu l'viadge cultive,
C'est si tranquille ! mais d'meru dzos
Et s'mau stitchè, lu long des rives
D'enne aiwe fagnante, d'abîmes, ah, no !
Pa d'lez Transenne, Viance et Glaireuse,
C' est des vègins à z'esse tondu.
I gn'éè la Lesse o fond qui s'creuse
Enne belle courate allant so Rdu.
Waire d'aiwe o d'zeu et waire du pinte
Mais elle s' amonne tot bai douc'mint
Dins enn ètang. Elle sait ratinte
Tant qu l'barratche nu s'y cherre nin.
Là, in molin è trovu place.
Totautou d' li foirt habitè
Çu n'est djà waire li qui s' dusplace
So les monnées, et bin haurdè.
I parètrot qu l' viadje est ritche,
Qu'aux grosses maujons, i gn'è des sous !
Tot djondant l' huche, i gn'è la nitche
D'on laid gardien, nin bon du tout.
Nu l'fixez nin, ca c'est st'in fèle,
V'pônrîe r'tournè abîe s'vôns pas
Vos n'saurez nin s'la d'meure est belle
Des sèigneur'rîes, r'tchessè comme ça.
Lu sol est bon et waire à ruques
La plave lu mouye sins l'aderri
C' est l' vrai terrain po v'nu des truques
Gn'è nin mèsônye du les tchoisi.
Voci, lu viadje est plien d'aldrouffes.
Et chaque rupas dut esse vite fait.
Ossi, tot truque, il è galouffe
Lu ci qu'on dit raweu d'ochais.
Motôn qu'on put s'passè d'notaire,
Avu l'banquier et l'méd'cin d'bons ?
N'vaut-i nin mîe l'véterinaire
A Libin ? L'ci qu'y met l' sornom
Duvint dônvisse, gn'ahûte, expresse,
Suin p'tit mau qu'i lètchot d'vant.
I d'vint honteux, i s'toune, i s'dresse,
I pîle… i d'mande drogues et onguents.
