C’ esteut on plaijhi di sorlever l’ djusse d’ aiwe, di l’ ashire sol boird di l’ abuvroe. Po cmincî, l’ aiwe arivéve a ptits goirdjons tot passant par li stroet gozî divant di s’ enonder e-n on gros trûtchon. C’ esteut avou ene riscompinse po-z aveur hertchî li tcherete a mode tot montant l’ voye do Croupet.
I n’ les faleut houkî k’ on côp: "Vinoz, pitites, vinoz !" et, då coron del waide, les deus vatches sôrtixhént di l’ ombrire do gros tchinne. Dji cråyive, foû d’ on brouhisse di noerès åmonnes, li xhame, on solide ashia d’ bwès so troes pîs.
Li saeyea bén resseré inte les djambes, mononke fiestixheut les tetes do pés avou ene nokete di cråxhe sitindowe avou l’ påme di s’ mwin. Come les prumirès airs d’ on zimzim, les prumîs spritchas d’ laecea digntént so l’ alu do saeyea. Tot s’ emontant, les spritchas purdént ene grosse vwès å mitan di ptits bizants stourbions. Blankete, leye, roemyive tot schoyant s’ tiesse...et les moxhes. Cobén, avou s’ cawe, ele sorlevéve li calot amerikin di m’ mononke ki låtchive on sounant « nodidju ».
Ene dierinne foice so les tetes et l’ saeyea esteut plin a raboird. Ene tape sol gros del pate di drî, et l’ vatche fijheut on pas d’ costé. Avou precôcion, li laecea coreut doûçmint divins l’ djusse ki mes mwins ratnént, tot passant houte del pîce sins taetche do coloe... mins tot wårdant ene muzeure po rimpli l’ covra del djusse !
Sins rprinde alinne, dji beveu l’ tchôd laecea a gros goirdjons; on lite ! Li gosse montéve ezès narenes. Dji gletéve on pô tot rpurdant mi alinne.
« Louke tu avou t’ gros boudak »! Mi stoumak aveut houzé… Ene grosse reupe cloyeut l’ eurêye. On bouneur di tos les djoûs ezès vacances d’ esté. Tot m’ sovnant, dji soreye di totes mes « prumîs » dints.