Li djonne mame aspite li boneûr. Mågré qu’ èle pwète co l’ dou d’ sès parints qu’ ont d’hoté onk après l’ ôte so sîh meûs d’ timps, èlle èst-st-ûreûse… Èlle aveût fêt tot si d’wèr, lèye, li pus djonne dè l’ famile. Aveût d’moré avou sès parints dismètant qu’ sès frés èt soûrs, zèls, båtihît leûs vèyes bin lon. Èle l’zî aveût sacrifiyî s’ djonnèsse ! Èt portant, av’nante come èle l’ èsteût, l’ åreût-èle volou, qu’ èlle ènn’ åreût mètou pus d’ onk a sès pîds… Si rèscompinse rawårdéve si-eûre. On djonne docteûr ènn’ aveût toumé bleû sot. I s’ avît marié èt rademint, ine pitite båcèle aveût v’nou å monde. Lès vîs parints avit vèyou leû p’tite fèye divant d’ ènn’ aler. Lès grandès djôyes souwèt lès låmes èt lès djonnes parints nèvît-st-é bouneûr. Èt, après s’ aveûr bin candôzé, fièstî, èvolé èssonle a ‘nnè piède li tièsse, come totes lès djonnès copes, i sondjît a leû vicårèye a v’ni, a l’ dreûte vôye qu’ i volît drovî d’vant zèls come dès distriheûs.
Ci djoû-la, c’ èsteût l’ grand djoû ! L’ ci qu’ ine djonne mame ni roûvèye måy ! L’ ci qui si èfant fêt sès prumîs pas ! L’ ci qui l’ papa qui tint l’ èfant, l’ dislahe po lèyî cori adlé s’ mame qui l’ rawåde, lès brès’ å lådje ! Li ci qu’ ine mame vôreût fé sèpi a l’ tére ètîre qui s’ pitite båcèle rote !
Èle ni tint pus. A hipe qu’ arive l’ eûre dè l’ pôrminåde, vol-la so l’ vôye avou l’ èfant gåyotèye a princèsse. Vo-lzès-la so l’ pôrminåde di l’ île qui tos lès Hutwès kinohèt. L’ île a div’nou on park’ avou ine bèle alèye inte dès riglètes di tiyous. Lès vîs bordjeûs l’ åbitèt èt î ont båtî leûs mohones. Tins, djustumint, vola l’ vî Vincent qu’ èst-st-a copèner so s’ sou avou sès camas. Ènn’ a t-èle sondjî, li djonne cope, a l’ mohone Vincent. Qwand l’ vî ni sèrè pus la, èle sèrè-st-a vinde èt… Mins, l’ djonne mame a bin ôte tchwè è l’ tièsse. Ros’lante èt fîre, èle prind bin s’ timps po-z-ariver disqu’ å qwatron d’ vîs-omes èt d’ arinner l’ mêsse dè l’ mohone :
— Ne seriez-vous pas fier, monsieur Vincent, d’avoir une aussi belle petite fille ?
Èt ci-chal dè rèsponde :
— Qu’ ènnè f’rû-dje, don fèye ? Dji n’ a nole tète !
Tote djinnèye, li djonne mame dimora ståmus’.