Djåzans ‘nnè dès manèdjes, ou pus vite dès Trinte sîh manèdjes!
Mins, çou qu’ on-î f’séve surtout ås Trinte sîh Manèdjes, onk dès pus vîs èt dès pus bês båtimints d’ Hu[1], c’ èsteût djower cwårdjeûs. A bridge, li rwè dès cwårdjeûs ! Dispôye qwat’ eûres di l’ après-nonne disqu’ a quéque fèye passé mèye-nut’, ine binde d’ arèdjîs trim’leûs mahît lès cwåtes. Ènn’ aveût d’ totes lès fwèces: dès binamés, come dès djèks! Cès-la djowît gros djeû èt lès gros bilèts candjît d’ mwins a l’ eûre dè fé lès comptes. I n-aveût todi dès r’wêtants åtoû dè l’ tåve, mins, come di djusse, i n’ avît rin a dîre.
André, li mêsse dè l’ mohone, qui t’néve café, n’ èsteût nin mons årdant qu’ lès-ôtes, mins i pièrdéve a tot côp. Çoula n’ plèhît nin a s’ pîce-crosse di feume qu’ èsteût todi a l’ awête podri s’ candj’lète èt féve dès hègnes a l’ fin dè djeû tot vèyant si ome sètchî dès bilèts foû di s’ pôrtèfeûye... Èle brognéve èt aveût todi må s’ tièsse divant s’ èdwèrmi… Portant, li påye riv’na inte di zèls… Li sorîre rifloriha so lès lèpes dè l’ komère. C’ èst qu’ èle vèyéve après l’ pårtèye s’ bouname riçûre dès bilèts qu’ alît hoûzer s’ boûse.
Mins, çou qu’ èle n’ aveût nin adviné, c’ èst qu’ divant d’ ataker l’ pårtèye, l’ ome aveût hèré è l’ potche d’ å ci qui t’néve lès comptes on gros bilèt d’ mèy francs. A l’ fin, on lî rindéve si manôye so çou qu’ ‘l aveût pièrdou !