Aurvaye si trûve dins enne èchancreure.
Ça è stî scrît su in lîve por nos.
Autou do viatche, i gn'è des hônteures,
Mais d'in costè su trûve in goulot.
Vallée qui n' sint nin trop foirt la bîge,
Pa les crestais covrus du grands bouès.
Tins qu l'solai et l' bon vent ont prîge
Po lûre et l'rutchauffè tant qu'i v'lèt
Dju p'lans vantè s'petit territoire.
Des environs, c'est li l'mîe mettu.
Comme à l'Ardennne les hivièrs sont foirts,
Dins in bon coin, on s'plait à d'meru.
C'est nôns ancêtes qu'ont djouwè l'bai role,
A s'sitiquant si bin qu'ça dins l'fond.
Lu viatche s'est fait comme enne caracolle
Naturel'mint, en d'meure du lumçons.
Mais les Borquins s'fiyant s'Hurtebîche
Su sont mèlè d' gandeures. Po l'solai,
I l'ont roviè. Leu ville lu mèprîche!
D'vant leus huches, la glace tint, s'y fait,
Les foisse, ma frike, à mette des galotches.
Do gaîe prétimps l'savè pa l' coucou.
A Lorcy, sa voix sonne comme enne clotche.
I s'sint si bin. Quî dut esse djaloux?
L'humeure des djins è basè l'entente
Po r'paurti têrres et fonzais dins l'timps.
Les traites coirbaux s's'ont vorè à bande,
Dû qu'c'est la plainne sins soucis des tchmins.
O sol, leus ées nu prinds nin attatche.
Qu'i gn'oye do l'place, zais, u qu'i gn'oye pon,
N'ont nin waitè tant à bon paurtatche,
Sondgeant d'piyè les s'minces do l'région.
Oute do l'grande aiwe s'les thièrs, aux vallées
Plainess du brouyires, ça v'not bin aux leus
Po qu'su l' djibîe leu ratche soye lancée.
Mettus d'costè tos ces grands tchesseus!
A place rustique, les sauvatches lianes,
A bon endoit, des êtes doux et bons.
Et s't arrandg'mint pris po la sorface,
On s'est plottè, binauches, dins les fonds.
En vèrité, l'lumçon è veut clére
Quand, tout douc'mint sins l'veïe manoeuvrant
I s'est mettu quitte du ses compéres.
Sins waire boudgè, esse mîe qu'à courant.
Po prècautions, è sîe ses idées.
Dèlicat attatchant comme il est,
Rintrant ses coines à chaque grignôndée,
Il è rampè et s'è seu catchè.
Quand i s'est veu bin mettu s'sa tèrre,
En vrai lumçon, ç'astot d'y d'meru.
Pon d'ètrandgîes v'nant dins ses affères
Po l'embêtè, l'apaitchè d'doirmu.
Les routes, les trams qu partout on r'quîre
Po z'allè vite, n'astint nin à s'gout.
Aux trallalàs, n'vèyot pont d'av'nir
Qu'auk d'awarè, n'conv'nant nin du tout.
Gn'è do vrai, là. Enne petite rapraude,
Dins waire du timps, dju pônrans vollè.
Nos, djonnes lumçons, à s'plaquant sins fraude
Dju s'rans premîs po s'abèrdalè
Dins l'fond des airs, pus hônt qu'les coirnayes
Et s'tos les ci qui nos broyins l' dos.
Comme dju s'rans bin à nosse vî Aurvaye !
Rîe des grands routes, c'est co mîe par nos.
Aurvaye
Ciste ouve ci egzistêye eto divins ds ôtès ortografeyes : Modêye « L'Ardenne fouyue » — Feller — Rifondou walon.Aurvaye
L'Ardenne sobriquée (papîscrît),
Aurvaye