Vo nos rla avou l’ ivier so les rnos. Bén seur, vos m’ diroz ki les iviers ni sont pus çou k’ il estént, avou des 50 cintimetes a on mete di nive so l’ Årdene. Mins gn a tolminme des djoûs k’ i bijhe caraedje. Nén do bon tins po leyî les efants s’ acalourder avå les voyes. Ca, dinltins, docô k’ i gn aveut del nive, c’ esteut des rabindlaedjes d’ efants et d’ djonneas po nd aler rider avou leus scleyons so les voyes u les prés k’ estént sol tiene.
Come di djusse, les pus djonnes volént fé come les grands, et raboirder a l’ anuti, li mouzon edjalé, les doets sbijhés, et des pîs come des grognons d’ tchén. Gåre ås catåres ! Et priyî li Ptit Djezus po ki l’ matchurea ni toûne nén a peumoneye.
Lacobén k’ i gn a des tolus ki vnèt å scours des pôves parints cwand i n’ fijhèt nou bén cwand leus efants sont-st a l’ ouxh pa ene froedeur di tchén. C’ est les crodjambots do froed.
Fijhans cnoxhance, po cmincî, avou Pépé Djan Bijhon, li captinne des pépés do vint. Il atake a tourner les viyaedjes dedja å djoû des åmes (2 d’ nôvimbe). Cwand i voet èn ome ki trinne dins les campagnes u les virêyes estô d’ aler s’ les tombes, il evoye ses « djins » po l’ pûni tot li scoriant avou des baguetes di froedeur. L’ ome rarive a s’ måjhon transixhant d’ froed.
Po les efants, c’ est puvite l’ Ome ås Rodjes Dints. On n’ såreut dire si ses dints sont rodjes pask’ i sonnèt d’ ådvins, u avou l’ sonk des efants k’ il a apicî et magnî. On cåze purade di lu dins l’ payis d’ Vervî et Spå.
Gn a eto Rodje Bounete ki s’ tént cobén so l’ pont del Mårtchete a Måtche. Mins on l’ sait ossu rescontrer dins li spexheur come li Spetin.
Ci-la, dji vos è cåzrè èn ôte côp.
Sicrît li 31 di decimbe 2025, ey eplaidî avou s' ratournaedje e francès dins l' lete toûnrece « Arduina » do « Club ardennais », limero d' l' ivier 2025-2026