Dinltins, gn aveut pont d’ grosse machene (mexhneuse-bateuse) po fåtchî les dinrêyes d’ awousse et les bate sol tchamp. Li bataedje si fjheut après, do waeyén-tins u d’ l’ ivier.
Disk’ al prumire mitan do 20inme sieke, on bateut co al mwin. Gn aveut deus manires di fé : å bok u å flayea.
Cwand on vleut wårder li strin beazet long, metans po fé des wås u des rawetes (fåssons), on bateut å bok. C’ esteut come ene gade di bwès, des côps foirt brouxhire, k’ on flaxhive les påtes des djåbes dissu (foto).
L’ ôte sistinme, c’ esteut bate å flayea. On fjheut ça so l’ aire di gregne (batire, daegn) cwand i djaléve. Sovint, les cinsîs s’ rashonnént a cope u a troejhinne, et bouxhî avou l’ flayea so les dinrêyes k’ estént stramêyes al tere. I tapént onk après l’ ôte, po wårder on metou rite. Et tipetape et tipetape ! C’ esteut gaiy a-z ôre, mins i faleut des foirts omes po wårder l’ cadince.
Dins les pus tchôds payis, la k’ i n’ ploût nén co après l’ awousse, on sait bate les dinrêyes tot les fjhant pesteler pa des tchvås u des moulets. Li moenneu s’ mete å mitan, et fé tourner les biesses so les djåbes k’ ont stî drovowes e-n on rond sol batire.
Cwand on-z a yeu rascodou les grinnes, elzès fåt co raidjî (tamjhî). Dj’ ô bén : schåyî l’ bon grin des payes (u : payetes), et des grinnes des crouwås k’ ont crexhou avou les dinrêyes. Gn aveut co pont d’ pulverizaedje, adon !
C’ est l’ ovraedje do ptit van, on rond tamis k’ on tneut al mwin, et tiper les nichtés evoye. Mins faleut awè l’ toû po l’ fé.
Dedja pus avancî, c’ esteut on grand cwåré raidje ki pindeut a on sômî u al tcherpinte del xheure.
Sicrît li 8 di setimbe, ey eplaidî avou s' ratournaedje e francès dins l' lete toûnrece « Arduina » do « Club ardennais », limero do waeyén-tins 2025