Dispôy ine tchoke, li nut′ èst toumêye. On-z-a èspris l’ kinkèt qui tape si loumîre so l’ tåve, tot lèyant l’ rèstant dèl piéce è li spèheûr.
Assiou èl coulêye, li grand-père beût s’ vêre di bîre a p’tits goûrdjons ; vison-visu, li vîle måma tèhe ine tchåsse ; li mame coûrt chal èt la po r’mète li manèdje a pont. On ratind lès djouweûs d’ cwårdjeûs.
On-z-ôt clitch’ter a l’ ouh : vo-lès-la.
— Bonut′, mêsse ! bonut′, nosse dame !
— Bonut′, li k’pagnèye ! qué novèle ? si va-t-on r’sayî ?
On bardouhèye avå lès tchèyîres.
— Î êstans-gne ? Quî èst-ce qui mahe ?
Ine munute pus tård, a pårt li brut dès cwårdjeûs qui r’toumèt so l’ tåve, on-z-ôreût voler ‘ne mohe.
Li mame s’a-st-assiou, li p’tit houlot so s’ hôt.
Lès-ôtes cårpês, bin vite nåhis dè d’mani keûs, djouwèt a s’ rôler al tére, divins lès cwènes.
Di tins-in tins, i v’nèt stitchî leû vizêdje dè costé dèl tåve ; i sûvèt lès djèsses dès djouweûs, avå l’ foumîre dès pîpes, ou bin hoûtèt ‘ne gote lès mèssèdjes qu’on s’ raconte inte deûs djeûs.
« Oho ! vormint ! dj’ènn’ a-st-apris ‘ne bone !… »
— Dîre qu’i-n-a dès-annêyes, djoû po djoû, dji sîzéve åtoû dè feû d’ camp, tot près d’ Lèpsik…
— Ni djåzans nin oûy dèl guére, fré Doné ! S’on tchantéve si bokèt ?
— A la bone eûre ! Va-z-î, Matî ! »
Èt lès-eûres passèt, trop coûtes. Lès-enfants sont-st-èvôye dwèrmi dispôy longtimps, qwand c’èst qu’on s’ drèsse.
« Disqu’al saminne !
— Awè ; ni brèyez nin si reûd ; vos lès-alez dispièrter ! »
Èt tot fant qu’on sère l’ouh å fèrou, li brut dès pas discréh å lon, èl påhûlisté dèl rouwale.