Al friskâte
On fautche dumwin l' Prè do Tièr qu'èst bin niche,
Èt, ç' vèspréye-ci, Batisse rubat sa fau,
Pa dol roséye il èst bon qu'i frèchiche :
Lu d' friscotè ainsi ç' sèrè sins mau.
Si l' solê toque dîs côps d' fau… on rawiche,
Gn-è dès framoûjes, dès soyons tot-avau.
L' vî Bèrtholet aîderè po qu'on finiche
Tot timpe ; zês deûs ont dès lames come i faut.
« Tu m' rawayerès, dit Batisse à sa feume,
Duvant l'êreûr, po-z-èsse là t'-t-au matin. »
« Waite, là l'ôrlodje, di-st-èle, pinds-î l'agleume,
Ca l' pwèds s' dusgritche èt l' rèvèy nu va nin. »
« Â : dit Batisse, dju f'raî mî pa dol pleume :
Dju djokerai l' coq dulé l' lit, t' l'ôrès bin. »