Tot passant d’vant l’ banque dêrèn’mint, dji tûzeu : dins l’ timps, on r’ciyeut on-ajenda po mârquè tot c’ qu’on d’veut rit’nu. Èt di c’ timps-là, gn’aveut rin à payi. Lès-anéyes ont passè èt i n’ nos-ont pupont d’nè d’ajenda pac’qu’i d’vint spaurgni dès caurs po sawè payi lès-emplwèyés. Adon, i nos-ont faît payi por zèls tinu nos comptes.
Après, i n’ont pus remplacè lès-emplwèyés qui purdint leû pension èt i nos faut tot l’ min.me todi payi po t’nu nos comptes, qui nos t’nans nos-ôtes min.mes. Portant, nos n’ riciyans todi pont d’ajenda. Mins, asteûr, mia qu’ ça, i nos-ont r’tirè lès distributeûrs di caurs, nos-èstans oblidji di trèvaurchi tote li vile po z-awè lès liârds qu’i nos faut. Li seûl pitit problin.me, c’èst qu’on n’èst pus sûr qu’i gn’a co dès caurs dins leûs machines. Di pus, i n’î faît nin todi fwârt prôpe dins li sale avou lès distributeûrs. Po quî c’ qu’on nos prind ?
Ôte tchose asteûr, s’i nos faut on p’tit consèy, nos d’vans tèlèfonè po z-awè on rendez-vous dins leûs bûraus. Nos payans todi po l’s-emplwèyés qui n’ sont quausumint pus là, nos n’ riciyans pupont d’ajenda èt nos n’avans pus rin, ou quausu pus rin, à l’ fin d’ l’anéye quand on cause dès-intèrèts.
Mins qu’èst ç’ qu’i fiyèt avou nos caurs, dji m’èl dimande ? Ayi, c’èst l’ vraî, dji roviyeu, i l’zî faut payi leûs bias grands bûraus èt lès tchaufè bin sûr, èt asteûr tchaufè dès bûraus ça costéye tchîr.
 bin, vo-m’-là rapauji, dji comprind poqwè qu’on n’a pupont d’ajenda, qu’on dut payi tos lès mwès po nos comptes èt qu’on n’ ricî vraîmint pus rin à l’ fin d’ l’anéye quand on z-a one miète di caurs di costè. Nos-ôtes, on s’ sère li cinture po qu’ lès grands maîsses dès banques p’lèches bin vikè.
Qu’è pinsoz ? Dji n’ m’a nin brouyi, mi chone-t-i ?
Prézinté ås tåvlêyes di Cînè avou on ratournaedje e francès