Èl mwaisse d’èscole èy′ èl mârchau

Gazete des Foyons d' Cerfontinne lº 57, 2003

C'èst pa no mèstî qu' nos-avons
No pârt dè syince èyèt d' durions.
Vous, c'èst d'ène sôte,
Èt mi, d'ène ôte.

A scole, èl gamin du mârchau
N' choûteut waire ey′ apèrdeut mau.
Dins l' fôdje, pourtant, i n'ét nin bièsse
Mais pou l'ètude, c'é-st-ène dûre tièsse.

Èl mwaisse, vos savèz come ça va,
N' èl wèyeut nin voltî pus qu' ça
Èt quand c'ét l' lèçon d'ortografe,
I ly-aureut bin foutu dès bafes.

In djoû, come il aveut dandji
D' èn-osti qu' ét a-l-arandji
Vèlla qu'il arive al fôrdjète
Pou v'ni l'èrquai s'il esteut prèt′

Djustèmint l' mârchau è-st-an trin
D' fé dès crampons. I fout l' dairin
Au pid d' l' aglème su tous lès-ôtes
Èt sans rataquer 'ne nouvèle tchôde,
I d'mande dès nouvèles du gamin.
- Ça fait don, mwaisse, què ça n' va nin ?
- Â ! respond-t-i l'instituteûr,
Dè 'n' aureû n' bone si pâr maleûr
I stint tèrtous parêy a li !
C'èst qu' leû-z-aprinde a yèsse poli,
A bin compter, a scrîre sans fautes,
C'è-st-ôte tchôse què d' djouwer aus cautes.
Èy′ a-c't-eûre, quèstion d' vo gamin,
S'i continûwe, vos n' è f'rèz rin :
Què d'èsplique ou bin què d' bèrdèle,
C' èst l' minme què si d' causeû au pwèle !
Chanjemant d' discours… dè wè roci
Des crampons come dè 'n' ai dandji !
A d'jant ça, vèlla qu'i s'abache,
'N' apice yun… mais tout-d'-chute èl lache :
C'èst qu' c' ét l' dairin fait qu'i pèrdeut
A rostichant l' dèbout d' sès deuts.
- Si m' gamin sans fautes nè sét scrîre,
Dit-st-i l' mârchau s'rastènant d' rîre,
Li, l' crampon, i n' l' aureut djondu
Qu'a cominçant pa ratchi d'sus !