Vochal li féle kirièle di rîmeûs, feûs d'comèdèyes èt musikeûs di nosse vîle Sôcièté qui rèspondèt å côp d'apèl dè ci qu'èst-à leû tièsse, po mostrer leù rik'nohance èt po fé prézint d'on bokèt d leû coûr à leû mére : « Li Walonèye ».
Is sont acorous di totes lès cwèrnètes di nosse Tére Walone, dispôy les « Cheonq Clotchîs » disqu'âs Toûrs di Måm'dèy', rapoûlant å passèdje lès cis d' Mons, Charlèrwè, Nameur, Lîdje èt Vèrvîs, raskoyant so leû coûse lès copéres di Dinant, lès stokèsses fis dè payis Hèsbain èt lès fîrs payisans dèl forfante Årdène, djans, tos èfants dèl vigreûse Walonèye, po-z-apwèrter chaskeun′ leû pådje à nosse lîve d'ôr.
Nosse lîve d'ôr ?
C'èst-ine djåbe di paskêyes èt d'tinrûlès tchansons: c'èst-on hopê d' complintes èt d' fråhûlès r'mimbrances; c'èst-ine hôtelèye di sâvadjès fleûrs dès tchamps èt d'tchûzis djowês d'pårtchèt: c'èst-on boukèt là qu'chaque fleùr n'a mutwè nin l'minme hinêye mâgré qu'turtotes, portant, åyèssent situ ahîvêyes è l'ahanîre d'on coûr.
Toûrnez lès foyous d'nosse lîve d'ôr, vos n'î d'hoûveûrez qu'dévow'mint èt bonté, påtriyotîse èt lîbèrté, tos sintumints qui l'feû d'rimês fêt passer d'vins tos lès coûrs pace qui lès a d'hovrou è seun'.
A costé d'l'oûve dès vikants, vos i lérez l'grande pinsêye di nos mwèrts; vos sintrez trèssèyî l'åme dès cis qu'ont tchèrwé l'arôy' po qu'nos polahîze raskoyî èt mète è heûre li pus r'dohante dès mèhons.
C'èst po rinde oneûr al Walonèye èt po fièss'tî 'ne dîhinne di lusses d'on tchèvihant labeûr qui n's-avans volou nosse lîve d'ôr.
Qu'i siève di prézint ås cis qu'ont d'houyî l'fiyon èt qui seûy' on guide po nos èfants !
Adrovaedje do Lîve d’ôr.